সামৰিক কুচকাৱাজত অংশগ্ৰহণ কৰিবলৈ বিশেষ ৰে’লত উঠি চীনত উপস্থিত কিম জং উন

উত্তৰ কোৰিয়াৰ নেতা কিম জং উনে মঙলবাৰে পুৱা নিজৰ বিশেষ ৰে’লযোগে চীনৰ সীমান্ত পাৰ হৈছে। উত্তৰ কোৰিয়াৰ চৰকাৰী সংবাদ মাধ্যমে প্ৰকাশ কৰা অনুসৰি দ্বিতীয় বিশ্বযুদ্ধত জাপানে আনুষ্ঠানিকভাৱে আত্মসমৰ্পণ কৰাৰ বৰ্ষপূৰ্তি উপলক্ষে অনুষ্ঠিত হোৱা অনুষ্ঠানত অংশগ্ৰহণ কৰিবলৈ তেওঁ বেইজিঙলৈ ৰাওনা হৈছে।

উত্তৰ কোৰিয়াৰ চৰকাৰী বাতৰি কাকত ৰ’ডং চিনমুনে জনায় যে কিমে সোমবাৰে পিয়ংইয়াং এৰি আজি পুৱা সীমান্ত পাৰ হৈ চীনত প্ৰৱেশ কৰে। আজি পুৱাই বেইজিংত উপস্থিত হোৱাৰ সম্ভাৱনা আছে।

দক্ষিণ কোৰিয়াৰ য়নহাপ সংবাদ সংস্থাই কালি উত্তৰ কোৰিয়াৰ বিষয়ে অৱগত এজন ব্যক্তিৰ উদ্ধৃতি দি প্ৰকাশ কৰা অনুসৰি কিমে সামৰিক পেৰেডত অংশগ্ৰহণৰ বাবে ৰে’লযোগে বেইজিংলৈ ৰাওনা হৈছে।

ৰ’ডং চিনমুনত প্ৰকাশিত এখন ফটোত দেখা গৈছে যে কিমে নিজৰ সহায়কসকলৰ সৈতে গাঢ় সেউজীয়া ৰঙৰ বিশেষ ৰে’লত থিয় হৈ হাঁহি হাঁহি হাত জোকাৰি আছে। এই ৰে’লখনেই হয়তো বুলেটপ্ৰুফ বিশেষ ৰেলখন যিখনত তেওঁ আগতে চীন আৰু ৰাছিয়া আদি দেশৰ লগতে আন দেশলৈ গৈছিল।

ইপিনে, কালি উত্তৰ কোৰিয়াই শেহতীয়াকৈ চীনৰ ৰাষ্ট্ৰপতি ছি জিনপিঙৰ ভাষণক সমৰ্থন কৰে। সেই ভাষণত ছিয়ে বিশ্বব্যাপী অধিক ন্যায়সংগত শাসন ব্যৱস্থাৰ আহ্বান জনায়। এই লক্ষ্যত উপনীত হ’বলৈ চীন আৰু উত্তৰ কোৰিয়াৰ মাজত দ্বিপাক্ষিক সহযোগিতা আৰু অধিক শক্তিশালী কৰা হ’ব বুলিও তেওঁ কয়। এই সন্দৰ্ভত উত্তৰ কোৰিয়াৰ উপ-বিদেশ মন্ত্ৰীৰ মন্তব্য দেশখনৰ বৈদেশিক মন্ত্ৰালয়ৰ ৱেবছাইটত প্ৰকাশ পাইছে।

সোমবাৰে এখন সন্মিলনত ছি জিনপিঙে আমেৰিকাক পোনপটীয়াকৈ প্ৰত্যাহ্বান জনাই এখন নতুন বিশ্ব ব্যৱস্থা ‘গ্ল’বেল চাউথ’ উপস্থাপন কৰে। তেওঁ নতুন নিৰাপত্তা আৰু অৰ্থনৈতিক গাঁথনিৰ বাবে এক দৃষ্টিভংগীৰ ৰূপৰেখা দাঙি ধৰে। সন্মিলনত ৰাছিয়া আৰু ভাৰতৰ নেতাসকলো উপস্থিত থাকে।