নতুন প্ৰযুক্তিৰে সুৰক্ষিত কৰা হ’ব ভাৰত-বাংলাদেশ সীমান্ত: কেন্দ্ৰীয় গৃহ মন্ত্ৰী

কেন্দ্ৰই অসম আৰু পশ্চিমবংগৰ সৈতে সংলগ্ন হৈ থকা ভাৰত-বাংলা সীমান্ত ছীল কৰিবলৈ নতুন প্ৰযুক্তিৰ ব্যৱহাৰ কৰাৰ ব্যৱস্থা গ্ৰহণ কৰিছে।

কেন্দ্ৰীয় গৃহ মন্ত্ৰী ৰাজনাথ সিঙে শনিবাৰে কয় যে এক নতুন প্ৰযুক্তিৰ ব্যৱহাৰ কৰি সংহত সীমান্ত ব্যৱস্থাপনা পদ্ধতিৰে ভাৰত-বাংলা আন্ত:ৰাষ্ট্ৰীয় সীমান্ত সুৰক্ষিত কৰি তোলা হ’ব।

পশ্চিমবংগৰ আলিপুৰদুৱাৰত এখন নিৰ্বাচনী সভাত ভাষণ দি কেন্দ্ৰীয় গৃহ মন্ত্ৰীগৰাকীয়ে কয় যে দুৰ্বল সীমান্তৰ সুযোগ গ্ৰহণ কৰি বাংলাদেশৰ পৰা অবৈধ অনুপ্ৰৱেশ হৈ থকাটো দুৰ্ভাগ্যজনক।

গৃহ মন্ত্ৰী সিঙে লগতে কয় যে এই নতুন ব্যৱস্থাই অনুপ্ৰৱেশৰ লগতে চোৰাং কাৰবাৰ ৰোধ কৰাটো সহায় কৰিব আৰু ‘জনসংখ্যাৰ গাঁথনিৰ চৰিত্ৰ সলনি’ কৰাৰ মাজতে ৰাষ্ট্ৰখনৰ নিৰাপত্তা তথা সুৰক্ষা নিশ্চিত কৰিব।

গৃহ মন্ত্ৰীগৰাকীয়ে জানিবলৈ দিয়ে যে তেওঁ ইজৰাইল ভ্ৰমণৰ সময়ত সীমান্ত সুৰক্ষাৰ বাবে ব্যৱহৃত এনে প্ৰযুক্তি প্ৰত্যক্ষ কৰি আহিছে।