প্ৰশ্নকাকত ফাদিল বিতৰ্কৰ মাজতে NTA-ই স্থগিত ৰাখিলে CSIR-UGC NET পৰীক্ষা

NET পৰীক্ষাৰ পিছত পিছুৱাই দিয়া হৈছে CSIR-UGC NET পৰীক্ষা। সমগ্ৰ দেশতে প্ৰশ্নকাকত ফাদিলৰ বিতৰ্কৰ মাজতে ৰাষ্ট্ৰীয় পৰীক্ষণ সংস্থা (NTA)ই সৰ্বভাৰতীয় পৰীক্ষাটো পিছুৱাই দিয়াৰ সিদ্ধান্ত গ্ৰহণ কৰিছে।

অহা ২৫ আৰু ২৭ জুনত অনুষ্ঠিত হোৱাৰ কথা আছিল চি এছ আই আৰ-ইউজিচি নেট পৰীক্ষা। শুকুৰবাৰে নিশা এনটিএই জাৰি কৰা এক অধিসূচনাত কোৱা হৈছে যে, অনিবাৰ্য কাৰণ আৰু ‘লজিষ্টিক’ সমস্যাৰ বাবে সংশ্লিষ্ট পৰীক্ষা পিছুৱাই দিয়াৰ সিদ্ধান্ত লোৱা হৈছে। পৰীক্ষাৰ পৰিৱৰ্তিত সূচী এনটিএৰ ৱেবছাইটত জনোৱা হ’ব।

বিজ্ঞানৰ বিভিন্ন শাখাত জুনিয়ৰ ফেল’শ্বিপ প্ৰগ্ৰেমৰ বাবে প্ৰাৰ্থীৰ যোগ্যতা CSIR-UGC NET পৰীক্ষাৰ জৰিয়তে নিৰ্ণয় কৰা হয়। বিশ্ববিদ্যালয় অনুদান আয়োগৰ (ইউজিচি) নিৰ্ধাৰিত যোগ্যতাৰ মাপকাঠী পূৰণ কৰা ভাৰতীয় বিশ্ববিদ্যালয় আৰু মহাবিদ্যালয়সমূহত জুনিয়ৰ ৰিচাৰ্চ ফেল’শ্বিপ, লেকচাৰাৰশ্বিপ আৰু সহকাৰী অধ্যাপক পদৰ বাবে যোগ্যতা নিৰ্ণয় কৰিবলৈ এই পৰীক্ষা অনুষ্ঠিত কৰা হয়।

অৱশ্যে এই গুৰুত্বপূৰ্ণ সৰ্বভাৰতীয় পৰীক্ষা স্থগিত ৰখাৰ আঁৰৰ সঠিক ‘অনিবাৰ্য’ কাৰণসমূহ এন টি এয়ে স্পষ্ট কৰা নাই।

উল্লেখ্য যে চিকিৎসা বিজ্ঞানৰ স্নাতকসকলৰ প্ৰৱেশ পৰীক্ষাক লৈ ব্যাপক বিতৰ্কৰ সৃষ্টি হৈছে। সমগ্ৰ দেশতে নীট পৰীক্ষাত অনিয়মৰ অভিযোগ উত্থাপন হৈছে। ইয়াৰ পিছত ১৮ জুনত অনুষ্ঠিত হোৱা ইউ জি চি নেট পৰীক্ষা এন টি এৰ দ্বাৰা বাতিল কৰা হৈছে। সেই পৰীক্ষাৰ তদন্তৰ নিৰ্দেশ দিয়া হৈছে।

দেশত নীটক লৈ চলা হুলস্থুলৰ মাজতে স্বচ্ছতাৰ অভাৱৰ কাৰণে এনটিএই বাতিল কৰিছে ইউজিচি-নেট ২০২৪। কিছুদিনৰ পিছত এইবাৰ CSIR-UGC NET পৰীক্ষাও অনিৰ্দিষ্টকাললৈ পিছুৱাই দিয়া হৈছে।

মন কৰিবলগীয়া যে এইবাৰ নীট পৰীক্ষাত গ্ৰেচ নম্বৰ পোৱাৰ বাবে বহু পৰীক্ষাৰ্থীয়ে ৭২০ নম্বৰৰ ভিতৰত ৭২০ নম্বৰ লাভ কৰে। যিটো এক কথাত অসম্ভৱ! ইফালে বিহাৰৰ পাটনা আৰক্ষীয়েও এই পৰীক্ষাৰ প্ৰশ্নকাকত ফাদিলৰ চক্ৰ উদ্ধাৰ কৰিছে। ইউজিচি-নেট পৰীক্ষা বাতিল হোৱাৰ বিপৰীতে চৰকাৰে নীট বাতিলৰ কোনো পৰিকল্পনা নাই বুলি উল্লেখ কৰিছে। তাৰ মাজতে এন টি এৰ দ্বাৰা পৰিচালিত আন এক পৰীক্ষা স্থগিত ৰখাৰ জাননী জাৰি কৰা হৈছে।