গুৱাহাটী চিকিৎসা মহাবিদ্যালয়ত হত্যাকাণ্ড : ইছলিম আলীৰ আক্ৰমণত নিহত চন্দন ধৰ
গুৱাহাটী চিকিৎসা মহাবিদ্যালয়ত মঙলবাৰে সংঘটিত হৈছে এক হত্যাকাণ্ড। ৰোগীৰ এটেনডেন্ট ইছলিম আলি নামৰ এজন লোকে আন এজন এটেনডেন্ট চন্দন ধৰ নামৰ ব্যক্তিক হত্যা কৰে।
মঙলবাৰে পুৱা প্ৰায় ৬ বজাত সংঘটিত হয় এই হত্যাকাণ্ড। আৰক্ষীয়ে হত্যাকাৰী ইছলিম আলীক গ্ৰেপ্তাৰ কৰিছে।
জানিব পৰা মতে, ইছলিম আলি আৰু চন্দন ধৰ দুয়োজনৰে পত্নী চিকিৎসা মহাবিদ্যালয়খনৰ প্ৰসূতি বিভাগৰ আই চি ইউত চিকিৎসাধীন হৈ আছিল।
ধৃত ইছলিমৰ ঘৰ বিজনীৰ শুনাইকলাত বুলি জানিব পৰা গৈছে। আনহাতে,মৃত চন্দন ধৰৰ ঘৰ বশিষ্ঠ চাৰিআলিৰ নতুন বজাৰত।
ইতিমধ্যে আৰক্ষীয়ে ৩৯৯/১৯ গোচৰত তথা ৩০২ ধাৰাত অভিযুক্ত ইছলিম আলীৰ বিৰুদ্ধে এটা গোচৰ ৰুজু কৰিছে।
ঘটনা বিবৰণী অনুসৰি, পুৱা মৃত চন্দন ধৰে হাতত পানী লৈ গৈ থকা অৱস্থাত মূৰ ঘূৰাই বিপৰীত দিশৰ পৰা আহি থকা ইছলিম আলিৰ পত্নীৰ গাত ঢলি পৰি যায়।
ইয়াৰ পাছতে পত্নীৰ লগত থকা ইছলিমে চন্দনক আক্ৰমণ কৰে। ইছলিমৰ আক্ৰমণৰ ফলত চন্দন থিতাতে নিহত হয়।