হিজবুল মুজাহিদিনৰ সদস্য কামাৰ উজ জামানক আশ্ৰয় দিয়া এজনক বৰ্ণিহাটৰ পৰা গ্ৰেপ্তাৰ

আজি মহানগৰৰ দিচপুৰ আৰক্ষীয়ে বৰ্ণিহাটৰ পৰা এখন আনন্দমেলাত চকৰি ঘূৰাই থকা কামত নিয়োজিত ওমৰ ফাৰুক নামৰ এই লোকজনক গ্ৰেপ্তাৰ কৰিছে। ধৃত ওমৰ ফাৰুকৰ ঘৰ হোজাইত। ওমৰৰ ঘৰ হোজাই থানাৰ অন্তৰ্গত শ’লমৰা গাৱঁত। বয়স প্ৰায় ৩৫ বছৰ। দেউতাক প্ৰয়াত মোস্তাফুল হক।

আৰক্ষীয়ে জানিবলৈ দিয়া মতে ওমৰৰ সৈতে অলপতে কানপুৰত গ্ৰেপ্তাৰ হোৱা আৰু কাশ্মীৰৰ সন্ত্ৰাসবাদী সংগঠনত হিজবুল মুজাহিদিনৰ সদস্য হিচাপে কাম কৰা অসমৰ যুৱক কামাৰ উজ জামানৰ সম্পৰ্ক থকাৰ খবৰ পোৱা গৈছে।

দিচপুৰ আৰক্ষীয়ে জনোৱামতে, চোৰাংচোৱাৰ সূত্ৰৰ আঁত ধৰি অভিযান চলাই আৰক্ষীয়ে ওমৰক গ্ৰেপ্তাৰ কৰে। অৱশ্যে বৰ্তমানলৈকে ধৃত ফাৰুকৰ পৰা কোনো স্বীকাৰোক্তি লাভ কৰা নাই আৰক্ষীয়ে।

আৰক্ষীয়ে দাবী কৰামতে, ঈদৰ ৭-৮ দিনৰ আগতে হিজবুল মুজাহিদিনৰ সদস্য কামাৰ উজ জামান ওমৰ ফাৰুকৰ শ’লমৰাৰ ঘৰত আহি থাকিছিল। ওমৰৰ ঘৰত ৭-৮ দিন কটাই ঈদৰ ৩ দিন পাছত কামাৰ উজ জামান দিল্লীলৈ গৈছিল। তাৰ পিছতে উত্তৰ প্ৰদেশৰ কানপুৰত সন্ত্ৰাসবাদী বিৰোধী গোটৰ (ATS) হাতত গ্ৰেপ্তাৰ হয়।

আনহাতে আৰক্ষীয়ে দাবী কৰামতে, ওমৰক কামাৰ উজ জামানৰ সৈতে শ্বহানৱাজ আলম নামৰ এজনে চিনাকি কৰাই দিছিল। ইতিমধ্যে আৰক্ষীয়ে হোজাইৰ পৰা শ্বহানৱাজকো গ্ৰেপ্তাৰ কৰিছে।