কেৱল উত্তৰ প্ৰদেশতে ভোটাৰ তালিকাত ১ কোটি সন্দেহজনক ভোটাৰ! নিৰ্বাচন আয়োগৰ নিজা তদন্তত চাঞ্চল্যকৰ তথ্য

উত্তৰ প্ৰদেশৰ পঞ্চায়ত নিৰ্বাচনৰ পূৰ্বে ৰাজ্যৰ নিৰ্বাচন আয়োগৰ আভ্যন্তৰীণ তদন্ততে চাঞ্চল্যকৰ তথ্য পোহৰলৈ আহিছে। ভোটাৰ তালিকাত ১ কোটি সন্দেহজনক ভোটাৰ পোৱা গৈছে। সূত্ৰ অনুসৰি একাংশ ভোটাৰৰ ক্ষেত্ৰত ভোটাৰ তালিকাত নামকে ধৰি বিভিন্ন তথ্য একেই। ঠিকনা আৰু ফটো সম্পূৰ্ণ বেলেগ। আকৌ কিছুমানৰ ক্ষেত্ৰত নামবোৰ একেই।

উত্তৰ প্ৰদেশত ভোটাৰ তালিকাৰ সত্যাসত্য নিৰূপণৰ বাবে প্ৰথমবাৰৰ বাবে কৃত্ৰিম বুদ্ধিমত্তা বা এআই ব্যৱহাৰ কৰা হৈছে। ভোটাৰ তালিকাৰ অনিয়ম পোহৰলৈ আহে এই পৰীক্ষণ প্ৰক্ৰিয়াত। অৱশ্যে সূত্ৰৰ পৰা জানিব পৰা মতে, ইতিমধ্যে ব্লক পৰ্যায়ৰ বিষয়া আৰু জিলা দণ্ডাধীশক ঘৰে ঘৰে গৈ সন্দেহজনক ভোটাৰক পৰীক্ষা কৰিবলৈ নিৰ্দেশ দিয়া হৈছে। উত্তৰ প্ৰদেশৰ নিৰ্বাচন আয়ুক্ত ৰাজ প্ৰতাপ সিঙে কয়, ‘আৰ্টিফিচিয়েল ইনটেলিজেন্স টেকন’লজি আৰু ফেচ ৰিকগনিশ্যন চিষ্টেমে এইবাৰ নিৰ্বাচনী প্ৰক্ৰিয়াত বিশেষ ভূমিকা ল’ব।বিশেষকৈ স্পৰ্শকাতৰ বুথত ভুৱা ভোটাৰ চিনাক্তকৰণৰ বাবে এআই প্ৰযুক্তি ব্যৱহাৰ কৰা হ’ব।

শেহতীয়াকৈ ভোট লাভ কৰা বিহাৰত আৰম্ভ হৈছে বিশেষ কঠোৰ সংশোধন। কিন্তু ৰাষ্ট্ৰীয় নিৰ্বাচন আয়োগে প্ৰকাশ কৰা খচৰা তালিকাতো হাজাৰ হাজাৰ ‘ভূত’ ভোটাৰ পোৱা গৈছে। ‘দ্য ৰিপ’ৰ্টাৰ্ছ কালেকটিভ’ৰ তথ্য অনুসৰি বিহাৰৰ বাল্মিকীনগৰ বিধানসভা সমষ্টিত কমেও এহেজাৰৰো অধিক এনে ভোটাৰ পোৱা গৈছে। উত্তৰ প্ৰদেশৰ ভোটাৰ হোৱা সকলৰ নাম জিলিকি উঠিছে বিহাৰৰ ভোটাৰ তালিকাত।

এই তথ্য পোহৰলৈ অহাৰ পিছত স্বাভাৱিকতে ৰাজনৈতিক মহলত আলোড়নৰ সৃষ্টি হৈছে। বিৰোধীয়ে দাবী কৰিছে যে নিৰ্বাচন আয়োগে বেলট বাকচত সুবিধা লাভৰ বাবেহে বিজেপিৰ নিৰ্দেশত এই কাম কৰিছে। কিন্তু এই বিষয়ত আয়োগ বা কেশৰ শিবিৰৰ পৰা কোনো সঁহাৰি পোৱা নাই। উল্লেখযোগ্য যে ইয়াৰ পূৰ্বে পশ্চিমবংগৰ মুখ্যমন্ত্ৰী মমতা বেনাৰ্জীয়ে ৰাজ্যিক বিধানসভাত থিয় দি প্ৰথমবাৰৰ বাবে ‘ভূত’ ভোটাৰৰ বিষয়টো উত্থাপন কৰিছিল। নেতাজী ইনড’ৰ ষ্টেডিয়ামত তৃণমূলৰ মেগা ৰেলী মঞ্চৰ পৰাও একেটা বিষয় উত্থাপন কৰে। ভুৱা ভোটাৰ ব্যৱহাৰ কৰি ভোট বৃদ্ধি কৰি ২৬ সংখ্যক বিধানসভা নিৰ্বাচনত কেশৰ শিবিৰে জয়ী হ’বলৈ চেষ্টা চলাইছে বুলি দাবী কৰে ছাত্ৰীগৰাকীয়ে। মমতাই লগতে অভিযোগ কৰে যে বিজেপি নেতাসকলে নিৰ্বাচন আয়োগৰ ‘আশীৰ্বাদ’ লৈ এই কাম কৰি আছে। এনে পৰিস্থিতিত উত্তৰ প্ৰদেশত ১ কোটি সন্দেহজনক ভোটাৰৰ সন্ধান পোৱা গৈছে।