নিৰ্বাচনী ৰণপ্ৰস্তুতিঃ চিদাম্বৰমৰ অধ্যক্ষতাত কংগ্ৰেছৰ ইস্তাহাৰ সমিতি, সমিতিত গৌৰৱ গগৈ

২৪ৰ লোকসভা নিৰ্বাচনলৈ ৰণপ্ৰস্তুতিত নামি পৰিছে কংগ্ৰেছ। এই প্ৰস্তুতি হিচাপেই শুকুৰবাৰে কংগ্ৰেছে গঠন কৰিছে ইস্তাহাৰ সমিতি। প্ৰাক্তন কেন্দ্ৰীয় মন্ত্ৰী তথা জ্যেষ্ঠ নেতা পি চিদাম্বৰমৰ অধ্যক্ষতাত এই ১৬ জনীয়া সমিতি গঠন কৰা হৈছে।

এই গুৰুত্বপূৰ্ণ সমিতিখনত স্থান পাইছে অসমৰ কংগ্ৰেছ নেতা তথা লোকসভাত দলৰ উপ-নেতা গৌৰৱ গগৈয়ে। ছত্তীশগড়ৰ প্ৰাক্তন উপ-মুখ্যমন্ত্ৰী টি এছ সিং দেওক এই গুৰুত্বপূৰ্ণ পেনেলৰ আহ্বায়ক হিচাপে নিযুক্তি দিয়া হৈছে।

এই ১৬ জনীয়া সমিতিত আছে কৰ্ণাটকৰ মুখ্যমন্ত্ৰী সিদ্ধাৰমাইয়া আৰু কংগ্ৰেছৰ সাধাৰণ সম্পাদিকা প্ৰিয়ংকা গান্ধী ভাদ্ৰা। প্ৰাক্তন কেন্দ্ৰীয় মন্ত্ৰী আনন্দ শৰ্মা, জয়ৰাম ৰমেশ আৰু শশী থাৰুও এই সমিতিৰ অংশ।

অল ইণ্ডিয়া প্ৰফেচনেলছ কংগ্ৰেছৰ মুৰব্বী প্ৰবীণ চক্ৰৱৰ্তীৰ লগতে কংগ্ৰেছৰ জ্যেষ্ঠ নেতা তথা মণিপুৰৰ প্ৰাক্তন উপ-মুখ্যমন্ত্ৰী গাইখাংগামকো এই সমিতিৰ সদস্য হিচাপে স্থান দিয়া হৈছে।

সমিতিৰ আন সদস্যসকল হৈছে ক্ৰমে ইমৰাণ প্ৰতাপগড়ী, কে ৰাজু, ওমকাৰ সিং মাৰ্কাম, ৰঞ্জিত ৰঞ্জন, জিগনেশ মেৱানী আৰু গুৰদীপ সপ্পল। এই সমিতিখনেই আগন্তুক লোকসভা নিৰ্বাচনত কংগ্ৰেছ দলৰ এজেণ্ডা চূড়ান্ত কৰিব।

উল্লেখ্য যে, বৃহস্পতিবাৰে অনুষ্ঠিত হৈছিল কংগ্ৰেছ ৱৰ্কিং কমিটীৰ এক গুৰুত্বপূৰ্ণ বৈঠক। এই বৈঠকতে লোকসভা নিৰ্বাচনৰ কৌশল আলোচনা কৰি শীঘ্ৰে প্ৰাৰ্থীৰ নাম ঘোষণা কৰিব বুলি জানিবলৈ দিয়ে কংগ্ৰেছ নেতৃত্বই।