ভদীয়া বান আৰু শূঁৰ পোকৰ আক্ৰমণত তচনচ শিৱসাগৰৰ বহু পথাৰ

অসম চৰকাৰে কৃষকৰ উন্নয়ণৰ হকে যিমানে আঁচনিৰ কথা ঘোষণা নকৰক লাগে বাস্তৱত যে অসমৰ কৃষক ৰাইজৰ অৱস্থা তেনেই তথৈৱচ সেয়া অনস্বীকাৰ্য। কেৱল প্ৰকৃতিৰ ওপৰতে নিৰ্ভৰ কৰি কৃষি কাৰ্য কৰি অহা শিৱসাগৰ জিলাৰ বিভিন্ন অঞ্চলৰ কৃষক ৰাইজৰ আগতীয়া শালী খেতিসমূহ ভদীয়া বানৰ কবলত পৰাত তেওঁলোকৰ পেটতে হাত ভৰি লুকুৱা অৱস্থা হৈছে।

যোৱা এটা পষেক ধৰি মূষলধাৰে হোৱা বৰষুণৰ ফলত শিৱসাগৰ জিলাৰ জাঁজী আৰু মিটং নৈৰ বাঢ়নী পানীয়ে জকাইচুক পথাৰৰ বিস্তৃৰ্ণ কৃষি ভূমি প্লাবিত কৰাৰ উপৰিও দৰিকা নৈৰ বাঢ়নি পানীয়ে কোঁৱৰপুৰ মৌজাৰ প্ৰায় বিশ খনৰো অধিক গাঁৱৰ পথাৰসমূহ বুৰাই পেলায়।

উল্লেখযোগ্য যে প্ৰায় সকল কৃষকেই ভাদ মাহৰ প্ৰথম সপ্তাহতে ভুঁই ৰুই আজৰি হৈছিল যদিও বাঢ়নি পানীৰ ফলত সকলো সজাল ধৰা ৰোৱা পানীত ডুব যায়, আনকি এতিয়া ভাদ মাহ শেষ হ’বৰ হ’ল যদিও বহুকেইখন গাঁৱৰ কৃষকে এমুঠিও মাটি ৰুৱ পৰা নাই।

ইফালে ভূতৰ ওপৰত দানহ পৰা দি সজাল ধৰা ৰোৱাসমূহ শূঁৰ পোকে নষ্ট কৰি পেলোৱা দেখিবলৈ পোৱা গৈছে।

লক্ষণিয় যে জিলাখনৰ এজন জেষ্ঠ কৃষি উন্নয়ণ বিষয়াই জিলা কৃষি বিভাগে জিলাখনৰ ঠায়ে ঠায়ে এই সন্দৰ্ভদ সজাগতা সভা আয়োজন কৰিছে বুলি কৈছে যদিও কৃষক ৰাইজে কিন্তু তেওঁলোকৰ এই আপদকালিন সময়ত বুদ্ধি -ভৰষা দিবলৈ কৃষি বিভাগৰ ফালৰ পৰা কোনো ব্যৱস্থা গ্ৰহণ কৰা নাই বুলি অভিযোগ কৰে।

সেয়ে এতিয়া প্ৰশ্ন হয়, কি হ’ল কৃষি বিষয়া-কৰ্মচাৰী আৰু কৃষকৰ মাজৰ দূৰত্ব হ্ৰাস কৰাৰ বাবে অসম চৰকাৰে ঘোষণা কৰা পথাৰলৈ যাওঁ ব’লক আঁচনিৰ?