ধৰ্ম, ৰাজনীতি, অৰ্থনীতিৰ লগতে প্ৰতিটো বিষয় প্ৰকৃতিৰ ওপৰত নিৰ্ভৰশীল: পদ্মশ্ৰী যাদব পায়েং

“ধৰ্ম, ৰাজনীতি, অৰ্থনীতিৰ লগতে প্ৰতিটো বিষয় প্ৰকৃতিৰ ওপৰত নিৰ্ভৰশীল ৷” এই মন্তব্য “অৰণ্য মানৱ”খ্যাত পদ্মশ্ৰী যাদব পায়েঙৰ ৷

বৰপেটা মাধৱ চৌধুৰী মহাবিদ্যালয়ৰ সভাকক্ষত শুকুৰবাৰে অনুষ্ঠিত এক গাম্ভীৰ্যপূৰ্ণ সভাত অংশ গ্ৰহণ কৰি পদ্মশ্ৰী যাদব পায়েঙে উক্ত মন্তব্য আগবঢ়ায় ৷

মহাবিদ্যালয়খনৰ ৰসায়ন বিজ্ঞান বিভাগ আৰু পৰিবেশ কোষৰ উদ্যোগত অনুষ্ঠিত এক বক্তৃতা অনুষ্ঠানত “মানুহ আৰু পৰিবেশ” শীৰ্ষক বিষয়ত ভাষণ প্ৰদান কৰে পায়েঙে।

তেওঁ ভাষণত লগতে কয়,”আমি যি বৃত্তিত জড়িত নহও কিয় প্ৰকৃতিক ভাল পাবই লাগিব ৷” সাম্প্ৰতিক সময়ৰ পৰিবেশক লৈ যথেষ্ট উদ্বিগ্নতা প্ৰকাশ কৰাৰ লগতে পায়েঙে পৰিবেশৰ ভাৰসাম্য বজাই ৰখাৰ বাবে সকলোকে আহ্বান জনায়৷

ভাষণ প্ৰসংগত তেওঁ কিদৰে অৰণ্য সৃষ্টি কৰে আৰু তাৰ লগতে নিজৰ জীৱন সম্পৰ্কেও এক চমু বৰ্ণনা আগবঢ়ায় ৷

এই অনুষ্ঠানত মহাবিদ্যালয়খনৰ অধ্যক্ষ ড° প্ৰকাশ শৰ্মাৰ লগতে অধ্যাপক অধ্যাপিকা আৰু ছাত্ৰ-ছাত্ৰী সকল উপস্থিত থাকে ৷

মহাবিদ্যালয়খনত উপস্থিত হোৱাৰ সময়ত মহাবিদ্যালয়খনৰ এন চি চি আৰু এন এছ এছৰ সদস্য সকলে অভিবাদনেৰে আগবঢ়াই নিয়ে পদ্মশ্ৰী যাদব পায়েঙক ৷