টি২০ বিশ্বকাপৰ বাবে ভাৰতলৈ আহিব পাকিস্তান ক্ৰিকেট টীম, নিশ্চয়তা প্ৰদান বিচিচিআইৰ

চলিত বৰ্ষৰ অক্টোবৰত ভাৰতত অনুষ্ঠিত হ’ব টি২০ বিশ্বকাপ।

বিশ্বকাপৰ বাবে বৈৰী দেশ পাকিস্তানৰ ক্ৰিকেট দলটোৱে ভাৰতলৈ আগমণ কৰিব পাৰিবনে নাই, সেই লৈ চৰ্চা চলি আছিল।

তাৰ মাজতে বিচিচিআইৰ সম্পাদক জয় শ্বাহে জনাইছে চৰকাৰে নিশ্চিতি প্ৰদান কৰিছে পাকিস্তানৰ ক্ৰিকেটাৰসকলে ভাৰতৰ ভিছা লাভ কৰাত কোনো সমস্যা নাই।

কিন্তু পাকিস্তান ক্ৰিকেট দলটোৰ সমৰ্থক আৰু অনুৰাগীসকলে ভাৰতত মেচ উপভোগৰ বাবে প্ৰৱেশ কৰিব পাৰিবনে নাই, সেই লৈ ব’ৰ্ডে একো ব্যক্ত কৰা নাই।

বৰ্ডে জনায় যে বিষয়টো সম্পৰ্কে সময়ত সিদ্ধান্ত লোৱা হ’ব।

এখন ভিডিঅ’ বৈঠকত শ্বাহে জনায় যে বিশ্বকাপখনৰ মেচসমূহ দেশৰ ৯খন চহৰত অনুষ্ঠিত হ’ব।

চহৰকেইখন হৈছে- দিল্লী, মুম্বাই, চেন্নাই, কলকাতা, বাংগালুৰু, হায়দৰাবাদ, ধৰ্মশালা আৰু লক্ষ্নৌ।

ফাইনেলখন খেলোৱা হ’ব আহমেদাবাদৰ নৰেন্দ্ৰ মোডী ষ্টেডিয়ামত।

উল্লেখযোগ্য যে ভাৰত আৰু পাকিস্তানৰ মাজত কূটনৈতিক সম্পৰ্কত ব্যাঘাট জন্মাৰ ফলস্বৰূপে দেশ দুখনৰ মাজত বহুচৰ্চিত ক্ৰিকেটীয় সম্পৰ্কতো ইয়াৰ প্ৰভাৱ পৰিছে।

টি২০ বিশ্বকাপৰ বাবে আইচিচিৰ ওচৰত পাকিস্তান ক্ৰিকেট বোৰ্ডে ভাৰতীয় ভিছা লাভৰ বাবে দাবী জনাইছিল।