ৰাজস্থানৰ বাৰ্মাৰত আটক পাকিস্তানী গুপ্তচৰ

ৰাজস্থানৰ বাৰ্মাৰৰ পৰা এজন পাকিস্তানী গুপ্তচৰক আটক কৰা হৈছে। ভাৰতীয় সেনাবাহিনীৰ লগত জড়িত গুৰুত্বপূৰ্ণ তথ্য তেওঁ পাকিস্তানলৈ প্ৰেৰণ কৰাৰ অভিযোগ উঠিছে।

ৰাজস্থান আৰক্ষীৰ চোৰাংচোৱা শাখাৰ এডিজিয়ে শনিবাৰে এইকথা জানিবলৈ দিয়ে।

ৰাজস্থান আৰক্ষীৰ সন্ত্ৰাসবিৰোধী স্কোৱাড আৰু চিআইডিয়ে পাকিস্তানী গুপ্তচৰজনক আটক কৰে।

বাতৰি অনুসৰি, আটক কৰা এই ব্যক্তিজনে ভাৰতীয় সেনা বাহিনী সম্পৰ্কীয় গুৰুত্বপূৰ্ণ তথ্য ছচিয়েল মিডিয়াৰ জৰিয়তে পাকিস্তানৰ সেনাবাহিনীলৈ প্ৰেৰণ কৰিছিল।

চোৰাংচোৱা বিভাগে ব্যক্তিজনক প্ৰথমতে পাকিস্তানৰ চোৰাংচোৱা সংস্থা আইএছআইৰ হৈ গুপ্তচৰ বৃত্তিত জড়িত থকাৰ অবিযোগত গ্ৰেপ্তাৰ কৰে।

ব্যক্তিজন সীমান্ত অঞ্চলত শ্ৰমিকৰ কামত নিয়োজিত হৈ আছিল।

তেওঁ ছচিয়েল মিডিয়াৰ জৰিয়তে সেনাবাহিনী সম্পৰ্কীয় গুৰুত্বপূৰ্ণ তথ্য সীমান্তৰ সিপাৰলৈ প্ৰেৰণ কৰাৰ অভিযোগ উত্থাপিত হৈছে।

আৰক্ষীয়ে ব্যক্তিজনৰ ছচিয়েল মিডিয়াৰ একাউন্ট পৰীক্ষা কৰাত ভাৰতীয় সেনাবাহিনী সম্পৰ্কীয় বহু তথ্য লাভ কৰে  যিবোৰ তেওঁ পাকিস্তানৰ চোৰাংচোৱা সংস্থালৈ প্ৰেৰণ কৰিছিল।

পাকিস্তানী গুপ্তচৰজনক বৰ্তমান জয়পুৰলৈ অনা হৈছে আৰু তাত তেওঁৰ জেৰা অব্যাহত ৰখা হৈছে।