চৰকাৰৰ সংবাদ মেলত সাংকেতিক ভাষাৰ দোভাষী নিযুক্তিৰ বাবে উচ্চতম ন্যায়ালয়ত দাখিল আবেদন
প্ৰধানমন্ত্ৰী তথা কেন্দ্ৰীয় মন্ত্ৰীয়ে পৰিচালনা কৰা চৰকাৰী সংবাদ মেলৰ সময়ত কেন্দ্ৰ আৰু ৰাজ্যসমূহক সাংকেতিক ভাষাৰ দোভাষী প্ৰদান কৰাৰ নিৰ্দেশ বিচাৰি উচ্চতম ন্যায়ালয়ত আবেদন দাখিল কৰা হৈছে।
অধিবক্তা এম কাৰ্পাগামৰ দ্বাৰা দাখিল কৰা আবেদনত কোৱা হৈছে যে বিকলাঙ্গ লোকসকলৰ তথ্য আৰু যোগাযোগৰ সমান অধিকাৰ আছে।
কাৰ্পাগামে প্ৰতিবন্ধী ব্যক্তিৰ অধিকাৰ আইন ২০১৬ অনুসৰি প্ৰধানমন্ত্ৰী, কেন্দ্ৰীয় চৰকাৰৰ অন্যান্য মন্ত্ৰী, মুখ্যমন্ত্ৰী আৰু ৰাজ্য চৰকাৰৰ মন্ত্ৰীসকলৰ দ্বাৰা পৰিচালিত সকলো চৰকাৰী সংবাদ মেলত এজন সাংকেতিক ভাষাৰ দোভাষী ৰখাৰ নিৰ্দেশনা বিচাৰিছে।
আবেদনখনত উল্লেখ কৰা হৈছে যে আইনখনে বিকলাঙ্গ ব্যক্তিসকলৰ বিৰুদ্ধে ৰাজহুৱা লাভালাভ, কাৰ্যসূচী বা সেৱাসমূহৰ অৰ্থপূৰ্ণ প্ৰৱেশাধিকাৰ প্ৰদান কৰাত বিফল হোৱা বৈষম্যমূলক আচৰণ নিষিদ্ধ কৰে।
যোগাযোগৰ ক্ষেত্ৰত থকা বাধা বোৰ ভাঙি আন যিকোনো লোকৰ দৰে শ্ৰৱণ শক্তিৰ দুৰ্বলতা থকা ব্যক্তিসকলৰ সাংকেতিক ভাষাৰ জৰিয়তে সামাজিক অনুষ্ঠানত প্ৰৱেশাধিকাৰ দিয়া উচিত বুলি আবেদনখনত কোৱা হৈছে।