বিহালীত দুই চোৰাংচিকাৰী গ্ৰেপ্তাৰ, ৰাইফল জব্দ

বিহালী থানাৰ ভাৰপ্ৰাপ্ত বিষয়া আৰু বন বিভাগৰ অপৰাধ অনুসন্ধান শাখাৰ যৌথ উদ্যোগত মঙলবাৰে অভিযান চলাই দুজন দুধৰ্ষ চোৰাংচিকাৰীক আটক কৰিবলৈ সক্ষম হয়।

ধৃত চোৰাংচিকাৰী কেইজন হৈছে বিহালী ৰাংচালি সোণাৰীৰ তিলেশ্বৰ দাসৰ পুত্ৰ ৰাতুল দাস ওৰফে গুণ্ডা (৩৫) আৰু ৰাংচালি দলনীৰ সুধিৰাম দাসৰ পুত্ৰ বাবুল দাস (৩৫)।

বাবুল দাস ইতিমধ্যে ভাৰতীয় দণ্ড বিধিৰ অধীনত জি আৰ ৪২৬/১৪ আৰ্ম্চ এক্ট, ডব্লিউ এল(পি) আইনৰ অধীনত চেচন কেচ নং ১৩৬/১৬, আৰু কে আৰ ০৭/ ২০১৮-১৯ অভিযুক্ত।

চোৰাংচিকাৰী কেইজনৰ পৰা এটা পইন্ট থ্ৰী নট থ্ৰী ৰাইফল, এটা পইন্ট থ্ৰী নট থ্ৰী মেগজিন, এটা চাইলেঞ্চাৰ আৰু গঁড় চিকাৰত ব্যৱহৃত কৃষ্ণদেৱ শইকীয়াৰ এখন নাও জব্দ কৰে।

বিশ্বনাথ জিলাৰ উপ আৰক্ষী অধীক্ষকৰ নেতৃত্বত গহপুৰৰ মহকুমা আৰক্ষী বিষয়া, বিহালী থানাৰ আৰক্ষী বিষয়া আৰু বন বিভাগৰ বিষয়াসকলে যৌথভাৱে কৰা জেৰাত ধৃত চোৰাংচিকাৰীয়ে নিজৰ অপৰাধ স্বীকাৰ কৰিছে বুলি আৰক্ষী সূত্ৰত প্ৰকাশ কৰিছে।

উল্লেখ্য যে আৰক্ষীয়ে জব্দ কৰা ৰাইফলটো ২০১৯ চনত কাজিৰঙাৰ কঁহৰাত গঁড় হত্যাত ব্যৱহৃত কৰা বুলি আৰক্ষীয়ে জানিবলৈ দিছে।

আৰক্ষীয়ে এই সন্দৰ্ভত অধিক অনুসন্ধান অব্যাহত ৰাখিছে বুলি জানিব পৰা গৈছে।