বানপানীত আৰক্ষীৰ বিলৈ; ছোৱালী কলেজত পতা অস্থায়ী কাৰাগাৰৰ পৰা পলায়ন কৰা কয়দীক গ্ৰেপ্তাৰ কৰিহে পালে স্বস্তি

অসমৰ ভয়াবহ বানপানীয়ে বিভিন্ন জিলাৰ লগতে ভাৰত-বাংলাদেশ সীমান্তৱৰ্তী ধুবুৰী জিলাকো জলমগ্ন কৰাৰ ফলত পানী উঠিছিল ধুবুৰী কাৰাগৰত।

জিলা প্ৰশাসনে কয়দী সকলৰ অসুবিধা নহ’বৰ বাবে ধুবুৰী ছোৱালী মহাবিদ্যালয়লৈ ধুবুৰী কাৰাগাৰ স্থানান্তৰণ কৰিছিল আৰু তাত মুঠ ৪০৭ গৰাকী কাৰাবন্দীক ৰখা হৈছিল।

বানপানীৰ মাজতে ধুবুৰী ছোৱালী মহাবিদ্যালয়ৰ অস্থায়ী কাৰাগাৰৰ পৰা সুযোগ বুজি হাফিজুৰ ৰহমান নামৰ এগৰাকী কয়দীয়ে পলায়ন কৰিছিল।

ৰহমানক বিছাৰি ধুবুৰী সদৰ থানাৰ অতিৰিক্ত আৰক্ষী অধীক্ষক ত্ৰিনয়ন ভূঞাৰ নেতৃত্বত আৰক্ষীৰ দলে অভিযান আৰম্ভ কৰে আৰু ৬০ ঘণ্টাৰ মাৰাথান অভিযানৰ অন্তত ফকিৰগঞ্জৰ পৰা পুনৰ গ্ৰেপ্তাৰ কৰিবলৈ সক্ষম হয় কাৰাগাৰৰ পৰা পলায়ন কৰা হাফিজুৰ ৰহমানক।

আনহাতে, অভিযানকাৰী আৰক্ষী বাহিনীৰ দলটোৱে যন্ত্ৰচালিত নাৱেৰে পুনৰ ধুবুৰীলৈ লৈ আহে কয়দীটোক।

উল্লেখযোগ্য যে, গ্ৰীষ্মৰ বন্ধৰ বাবে ধুবুৰী ছোৱালী মহাবিদ্যালয়ত সাময়িকভাৱে পাঠদান বন্ধ আছে।