কৃষক নেতা অখিল গগৈৰ মুক্তিৰ দাবীৰে প্ৰতিবাদ কৰিবলৈ অহা প্ৰতিবাদকাৰীক আটক আৰক্ষীৰ

মহানগৰীত শনিবাৰে  অখিল গগৈৰ মুক্তিৰ দাবীৰে প্ৰতিবাদ কৰিবলৈ আহি আটক হ’ল প্রতিবাদকাৰী।

গুৱাহাটীৰ গণেশগুৰিৰ গণেশ মন্দিৰৰ সমীপত প্ৰতিবাদ সাব্যস্ত কৰিছিল অসম প্ৰেমী যুৱ ছাত্ৰ সমাজৰ প্ৰতিবাদকাৰীয়ে।

প্ৰতিবাদকাৰীসকলে কৃষক নেতা গৰাকীৰ মুক্তিৰ দাবীৰে আজি জে’ৰ ভৰো কাৰ্যসূচী গ্ৰহণ কৰিছিল।

কিন্তু প্ৰতিবাদৰ আৰম্ভণিতেই দিশপুৰ আৰক্ষীয়ে প্ৰতিবাদকাৰী সকলক আটক কৰি লৈ যায়।

অসম প্ৰেমী যুৱ ছাত্ৰ সমাজৰ প্ৰতিবাদকাৰীসকলে আজি গণেশ মন্দিৰৰ পৰা লখৰাস্থিত কেন্দ্ৰীয় কাৰাগাৰলৈ বুলি জে’ল ভৰো কাৰ্যসূচীৰে যাত্ৰা কৰাৰ কথা আছিল।

আৰক্ষীয়ে চোৰাংচোৱা সূত্ৰে খৱৰ লাভ কৰি প্ৰতিবাদী কাৰ্যসূচী আৰম্ভ কৰাৰ পূৰ্বেই তেওঁলোকক আটক কৰি লৈ যায়।

আৰক্ষীৰ পৰা অনুমতি নোলোৱাৰ বাবে তেওঁলোকক আটক কৰা হৈছে বুলি আৰক্ষীৰ শীৰ্ষ বিষয়াই অজুহাত দেখুৱাইছে।

ইপিনে, সম্পূৰ্ণ গণতান্ত্ৰিক প্ৰক্ৰিয়াৰে আন্দোলন কৰিব বিচাৰিছিল যদিও আৰক্ষীয়ে জোৰ জবৰদস্তি বৰ্বৰভাৱে টানি চোঁচোৰাই আটক কৰা বুলি অভিযোগ কৰে প্ৰতিবাদকাৰীসকলে।

আৰক্ষীয়ে অসম প্ৰেমী যুৱ ছাত্ৰ সমাজৰ নেতা মনোজ গগৈকে ধৰি আঠজন প্ৰতিবাদকাৰীক আটক কৰি লৈ যায়।