পিপই কিট কেলেংকাৰী: হিমন্ত বিশ্ব শৰ্মাৰ বিৰুদ্ধে সৰৱ তৃণমূলৰ সাংসদ শান্তনু সেন
অসমৰ মুখ্যমন্ত্ৰী ড৹ হিমন্ত বিশ্ব শৰ্মাৰ পত্নীৰ পিপিই কিট কেলেংকাৰীক লৈ সৰৱ হৈ পৰিছে তৃণমূল কংগ্ৰেছৰ সাংসদ শান্তনু সেন।অসম ভ্ৰমণলৈ অহা সাংসদগৰাকীয়ে আজি এক সংবাদমেলত মুখ্যমন্ত্ৰী হিমন্ত বিশ্ব শৰ্মাক তীক্ষ্ণ সমালোচনা কৰে।
মুখ্যমন্ত্ৰীৰ পত্নী ৰিণিকি ভূঞা শৰ্মাই দিল্লীৰ উপ-মুখ্যমন্ত্ৰী মনিষ ছিছ’দিয়াৰ বিৰুদ্ধে মানহানি গোচৰ তৰাৰ পাছতে এইবাৰ পিপিই কিট কেলেংকাৰীক লৈ প্ৰশ্ন তুলিলে শান্তনু সেনে।
আজি সংবাদমেলত সেনে পিপিই কিট কেলেংকাৰীৰ সন্দৰ্ভত মুখ্যমন্ত্ৰীক জবাবদিহি কৰি মুখ্যমন্ত্ৰীৰ পত্নীৰ কোম্পানীয়ে অধিক দামত পিপিই কিট ক্ৰয়ৰ বাবে কেনেকৈ অনুমতি পালে বুলি প্ৰশ্ন উত্থাপন কৰে।
আনহাতে পিপিই কিট কেলেংকাৰীৰ লগতে তৃণমূল সাংসদ গৰাকীয়ে মুখ্যমন্ত্ৰী পৰিয়ালৰ ভূমি কেলেংকাৰীক লৈও সৰৱ হৈ পৰে।
হিমন্ত বিশ্ব শৰ্মাক প্ৰত্যক্ষভাৱে আক্ৰমণ কৰি সেনে পিপিই কিট কেলেংকাৰীৰ লগতে হিমন্ত বিশ্ব শৰ্মাৰ বিৰুদ্ধে উত্থাপিত সাৰদা কেলেংকাৰী আৰু মুখ্যমন্ত্ৰীৰ পৰিয়ালৰ ভূমি কেলেংকাৰীৰ উচ্চস্তৰৰ তদন্ত হ’ব লাগে বুলিও দাবী তোলে।
ইফালে শাসনাধিষ্ঠ বিজেপি চৰকাৰকো সমালোচনাৰ লক্ষ্য কৰি লয় তৃণমূল সাংসদগৰাকীয়ে। বিজেপিৰ সাম্প্ৰতিক ৰাজনীতিক নিন্দা কৰি তেওঁ বাজপেয়ীৰ দিনৰ বিজেপি এতিয়া নাই বুলি দাবী কৰে।
আনহাতে মহাৰাষ্ট্ৰৰ বিসম্বাদী বিধায়কৰ অসমত আশ্ৰয় গ্ৰহণ সন্দৰ্ভত মন্তব্য কৰি তেওঁ মুখ্যমন্ত্ৰী হিমন্ত বিশ্ব শৰ্মাক মাষ্টাৰ অফ হৰ্ছ ট্রেডিং আখ্যা দিয়ে।
লগতে অসমত বানপানীৰ বিভীষিকাৰ সময়ত শিৱসেনাৰ বিসম্বাদী বিধায়কক আতিথ্য দিয়াৰ নামত ২ কোটি টকা ব্যয় কৰা হৈছে বুলিও অভিযোগ উত্থাপন কৰে ড৹ সেনে।