কাম-কাজ নিৰীক্ষণৰ বাবে নগাঁৱত এন আৰ চিৰ ৰাজ্যিক সমন্বয়ক প্ৰতীক হাজেলা

সমগ্ৰ ৰাজ্য পঞ্চায়তৰ নিৰ্বাচনী বতাহে গৰম কৰি থকাৰ সময়তে শুকুৰবাৰে নগাঁৱত ৰাষ্ট্ৰীয় নাগৰিক পঞ্জী উন্নীতকৰণ প্ৰক্ৰিয়াৰ ৰাজ্যিক সমন্বয়ক প্ৰতীক হাজেলা উপস্থিত হয়।

বিশেষ সূত্ৰে জানিব পৰা মতে, ৰাষ্ট্ৰীয় নাগৰিক পঞ্জী উন্নীতকৰণ প্ৰক্ৰিয়া (এন আৰ চি)ৰ কাম-কাজ নিৰীক্ষণৰ বাবে ৰাজ্যিক সমন্বয়ক হাজেলা নগাঁৱত উপস্থিত হয়।

নগাঁৱৰ আৱৰ্ত ভৱনৰ সভাগৃহত হাজেলাই জিলাখনৰ উপায়ুক্ত, অতিৰিক্ত উপায়ুক্ত, চক্ৰ বিষয়াৰ উপৰি জিলা প্ৰশাসনৰ কেইবাগৰাকী শীৰ্ষ বিষয়াৰ সৈতে এক বৈঠকত মিলিত হয়।

ৰাজ্যিক সমন্বয়ক গৰাকীয়ে জিলাখনত এন আৰ চিৰ দাবী-আপত্তিৰ পুনৰীক্ষণৰ কামৰ অগ্ৰগতি তথা প্ৰক্ৰিয়াটোত কিবা অসুবিধাৰ সৃষ্টি হৈছে নেকি সেই বিষয়ে বুজ লোৱাৰ উদ্দেশ্যে জিলা প্ৰশাসনৰ শীৰ্ষ বিষয়াসকলৰ সৈতে আলোচনাত মিলিত হয়।

উল্লেখযোগ্য যে উচ্চতম ন্যায়ালয়ৰ তত্বাৱধানত চলি থকা ৰাষ্ট্ৰীয় নাগৰিক পঞ্জীৰ কাম-কাজত সৰ্বোচ্চ ন্যায়ালয়খনে চোকা দৃষ্টি ৰাখিছে আৰু পূৰ্বতে কেইবাবাৰো ৰাজ্যিক সমন্বয়ক গৰাকীক কঠোৰ নিৰ্দেশনা দি ৰাখিছে।

এনে ক্ষেত্ৰত এন আৰ চিৰ কামত যাতে কোনো ধৰণৰ বেমেজালি নঘটে তাৰ বাবে ৰাজ্যিক সমন্বয়ক প্ৰতীক হাজেলা তৎপৰ হৈ পৰিছে। তদুপৰি, পঞ্চায়ত নিৰ্বাচনৰ নামত যাতে এন আৰ চিৰ কাম-কাজ যাতে বাধাগ্ৰস্ত নহয় সেইটো নিশ্চিত কৰিবলৈকো হাজেলাই প্ৰচেষ্টা চলোৱা বুলি জানিব পৰা গৈছে।