কিয় নিকৰ পাছত গুপ্তচৰ নিয়োগ কৰিছিল প্ৰিয়ংকাই? সদৰী কৰিলে বলীউদ সুন্দৰীয়ে

বলীউদৰ মোহময়ী অভিনেত্ৰী তথা প্ৰাক্তন বিশ্ব সুন্দৰী প্ৰিয়ংকা চোপ্ৰাই ২০১৮চনৰ ডিচেম্বৰত আমেৰিকান গায়ক নিক জোনাছৰ সৈতে বিবাহপাশত আৱদ্ধ হয়।

কিন্তু নিকৰ গতিবিধিত দৃষ্টি ৰখাৰ বাবে তেওঁৰ পাছত গুপ্তচৰ নিয়োগ কৰিছিল প্ৰিয়ংকাই। সম্প্ৰতি প্ৰকাশ পোৱা প্ৰিয়ংকাৰ আত্মজীৱনী ‘আনফিনিছ্ড’ত তেওঁ এই কথা লিখিছে।

২০১৮ চনত এদিন আচম্বিতে নিক জোনাছে টুইটাৰত প্ৰিয়ংকাক মেচেজ পঠিয়ায়। তাৰপাছত দুয়োজনে ফোন নম্বৰ আদান প্ৰদান কৰে। অস্কাৰৰ অনুষ্ঠানৰ পাছত হোৱা পাৰ্টিত দুয়োৱে দীঘলীয়া সময় ঘনিষ্ঠভাৱে কটায়।

ইয়াৰ পাছতে প্ৰেমৰ পৰ্ব আৰম্ভ হয় তাৰকা যুগলৰ। প্ৰেমে কুঁহিপাত মেলাৰ ঠিক এসপ্তাহ পাছতে প্ৰিয়ংকাৰ পৰিয়ালৰ সৈতে দেখা কৰিবলৈ মুম্বাইলৈ উৰা মাৰে নিক।

সেই সময়ত প্ৰিয়ংকা কিছু ব্যস্ত থকাৰ বাবে নিকে প্ৰিয়ংকাৰ মাক মধু চোপ্ৰাক লাঞ্চৰ বাবে লৈ যায়।

এই বিষয়ে উল্লেখ কৰি প্ৰিয়ংকাই লিখিছে,’’যিসকলে মোক চিনি পায় তেওঁলোকে জানে মোৰ কন্ত্ৰোল ইছ্যু আছে। নিকে মোৰ মাক লৈ লাঞ্চলৈ যাব বুলি শুনি আচৰিত হৈছিলো। কিয়নো তেওঁৰ সৈতে ডেট কৰা মাত্ৰ এসপ্তাহ হৈছিলহে। সেয়ে নিকৰ বডি লেংগুৱেজ লক্ষ্য কৰাৰ বাবে মোৰ ছিকিউৰিটিক (গুপ্তচৰ হিচাপে) পঠিয়াই দিওঁ আৰু ফটো তুলি আনিবলৈ কওঁ।‘’

প্ৰিয়ংকা আৰু নিকৰ ৰাজকীয় বিবাহে সংবাদমাধ্যমত বিশেষ চৰ্চা লাভ কৰিছিল। নিকতকৈ প্ৰিয়ংকা দহ বছৰে ডাঙৰ। ইয়াক লৈয়ো বিভিন্ন সময়ত প্ৰিয়ংকাই কটাক্ষৰ চিকাৰ হ’বলগীয়া হৈছে।

পিচে, বিশ্বৰ অন্যতম এই তাৰকা যুগলৰ প্ৰেমত কোনো ঘাটি পৰা নাই। বৰঞ্চ সময়ৰ লগে লগে সেয়া আৰু অধিক মধুৰ আৰু গভীৰহে হৈ পৰিছে।