মোডীৰ মুখামুখি হ’ব নে উত্তৰ প্ৰদেশৰ আন আসনৰ পৰা যুঁজ দিব প্ৰিয়ংকাই? চৰ্চাত নতুন খৱৰ!
২০২৪ চনৰ লোকসভা নিৰ্বাচনত প্ৰতিদ্বন্দ্বিতা আগবঢ়াব প্ৰিয়ংকা গান্ধীয়ে। স্বামী ৰবাৰ্টে ইতিমধ্যে সেই কথা ফাদিল কৰিছিল। কিন্তু কোনখন আসনৰ পৰা দলে তেওঁক টিকট দিব? এই বিষয়ে চৰ্চা অব্যাহত আছে। কোনোৱে কয় যে তেওঁ বাৰাণসীৰ পৰা প্ৰধানমন্ত্ৰী নৰেন্দ্ৰ মোদীৰ বিৰুদ্ধে যুঁজ দিব। আনহাতে বহুতেই ভাবে যে ছোনিয়া গান্ধীয়ে ৰায়বেৰেলীৰ আসনখন কন্যাক এৰি দিব। এনে জল্পনা-কল্পনাৰ মাজতে আহিছে এক নতুন খৱৰ।
জানিব পৰা মতে, পৰৱৰ্তী নিৰ্বাচনত প্ৰিয়ংকা গান্ধী ভদ্ৰাই উত্তৰ প্ৰদেশৰ ফুলপুৰৰ পৰা প্ৰতিদ্বন্দ্বিতা কৰিব পাৰে। এই ফুলপুৰ আসনখন গান্ধী পৰিয়ালৰ বাবে অতি আদৰৰ। এই আসনৰ পৰাই জৱাহৰলাল নেহৰুৱে ১৯৫২, ১৯৫৭ আৰু ১৯৬২ চনত জয়লাভ কৰিছিল।
উত্তৰ প্ৰদেশৰ তিনিটা সমষ্টি গান্ধী পৰিয়ালৰ দুৰ্গ হিচাপে পৰিচিত। আমেথি, ৰায়বেৰিলি আৰু ফুলপুৰ। অৱশ্যে প্ৰিয়ংকা কোনখন আসনত থিয় দিব সেই সন্দৰ্ভত এতিয়াও চূড়ান্ত কথা কোৱা নাই কংগ্ৰেছে।
প্ৰিয়ংকা গান্ধীয়ে মধ্যপ্ৰদেশৰ জবলপুৰৰ পৰা প্ৰতিদ্বন্দ্বিতা কৰিব পাৰে বুলিও দলৰ ভিতৰতে জল্পনা-কল্পনাৰ সৃষ্টি হৈছে। কিন্তু মধ্যপ্ৰদেশৰ বিধানসভা নিৰ্বাচনত কংগ্ৰেছে জয়ী হৈ ক্ষমতালৈ আহিলেহে সেয়া হ’ব পাৰে।
ইপিনে, কিছুদিন পূৰ্বে উত্তৰ প্ৰদেশত কংগ্ৰেছৰ ৰাজ্যিক সভাপতি অজয় মাকেনে কৈছিল যে বাৰাণসীত মোডীৰ বিৰুদ্ধে প্ৰিয়ংকাক দলে টিকট দিব পাৰে। তেওঁ এই সমষ্টিৰ যোগ্য প্ৰাৰ্থী।
২০২৪ ৰ লোকসভা নিৰ্বাচনৰ পূৰ্বে বিৰোধী ইণ্ডিয়া মিত্ৰজোঁটেই নহয়, গান্ধী পৰিয়ালেও আসন বুজাবুজি কৰিব পাৰে। দলৰ ভিতৰত এনে জল্পনা-কল্পনাই চলি আছে। সংসদীয় দলৰ অধ্যক্ষ ছোনিয়া গান্ধীয়ে কন্যাৰ বাবে আন এখন আসনলৈ স্থানান্তৰিত হ’ব পাৰে। কংগ্ৰেছ হাইকমাণ্ডে গুৰুত্বসহকাৰে চিন্তা কৰিবলৈ আৰম্ভ কৰিছে।
২০১৯ চনৰ পৰা ৰাজনীতিত সক্ৰিয়ভাৱে জড়িত হৈ থকা কংগ্ৰেছৰ সাধাৰণ সম্পাদক প্ৰিয়ংকা গান্ধীয়ে ইয়াৰ পূৰ্বে কেতিয়াও নিৰ্বাচনত অৱতীৰ্ণ হোৱা নাছিল। সেই ক্ষেত্ৰত তেওঁক এটা গুৰুত্বপূৰ্ণ আসনত প্ৰক্ষেপ কৰি কংগ্ৰেছে এটা ডাঙৰ চমক দিব পাৰে বুলি ধাৰণা কৰা হৈছে।
বিগত নিৰ্বাচনত আমেথিত স্মৃতি ইৰাণীৰ হাতত ৫৫ হাজাৰ ভোটত পৰাস্ত হৈছিলৰাহুল গান্ধী। সেই ‘প্ৰতিশোধ’ ভগ্নী প্ৰিয়ংকাই ল’ব পাৰিবনে? ৰাজনৈতিক মহলত তাকলৈ আৰম্ভ হৈছে সৰৱ চৰ্চা।