ৰাহুলে এৰি যোৱা ৱায়ানাদৰ পৰা নিৰ্বাচন খেলিব প্ৰিয়ংকাই : নিৰ্বাচনৰ আয়োগে ঘোষণা কৰিলে উপ-নিৰ্বাচনৰ দিন
মঙলবাৰে বিধানসভাৰ লগতে লোকসভাৰো উপ-নিৰ্বাচনৰ দিন ঘোষণা কৰিছে ভাৰতৰ নিৰ্বাচন আয়োগে।
নিৰ্বাচন আয়োগে প্ৰকাশ কৰা অনুসৰি অহা ১৩ নবেম্বৰত লোকসভাৰ উপ-নিৰ্বাচনৰ ভোট গণনা হ’ব আৰু ২৩ নবেম্বৰত ফলাফল ঘোষণা কৰা হ’ব।
নিৰ্বাচন আয়োগৰ এই ঘোষণাৰ পিছতে ৱায়ানাদৰ প্ৰাৰ্থী ঘোষণা কৰিছে কংগ্ৰেছে। ৱায়ানাদত প্ৰিয়ংকা গান্ধীয়ে প্ৰাৰ্থীত্ব আগবঢ়াব বুলি বিবৃত্তি প্ৰকাশ কৰিছে কংগ্ৰেছৰ সাধাৰণ সম্পাদক কে চি ভেনুগোপালে।
উল্লেখ্য যে ২০২৪ চনৰ সাধাৰণ নিৰ্বাচনত দুটাকৈ সমষ্টিৰ পৰা প্ৰতিদ্বন্দ্বিতা কৰিছিল কংগ্ৰেছ নেতা ৰাহুল গান্ধীয়ে। ৰায়বৰেলী আৰু ৱায়ানাদৰ পৰা প্ৰতিদ্বন্দ্বিতা কৰিছিল গান্ধীয়ে। তেওঁ দুয়োখন আসনত বৃহৎ ব্যৱধানত জয়লাভ কৰিছিল। দুখন আসনত জয় লাভ কৰিলেও নিয়ম অনুসৰি দুখন আসনৰ পৰা লোকসভাত প্ৰতিনিধিত্ব কৰিব নোৱাৰি। যাৰ বাবে যিকোনো এখন আসন এৰি দিব লগা হৈছিল তেওঁ। শেষত ৰায়বৰেলী সমষ্টিক প্ৰতিনিধিত্ব কৰাৰ সিদ্ধান্ত ল’লে গান্ধীয়ে। তেতিয়াৰ পৰা সাংসদবিহীন হৈ আছে ৱায়ানাদ সমষ্টিটো।
দীৰ্ঘদিন ধৰি ৰাজনীতিৰ লগত জড়িত হৈ আছে প্ৰিয়ংকা গান্ধী। দেশৰ ভিতৰতে এগৰাকী অতি জনপ্ৰিয় নেত্ৰী প্ৰিয়ংকা গান্ধী। দলৰ আভ্যন্তৰীণ বৈঠক আৰু প্ৰচাৰত সক্ৰিয় হ’লেও প্ৰিয়ংকাৰ বাবে এয়া হ’ব প্ৰথমখন প্ৰত্যক্ষ নিৰ্বাচনী যুঁজ।
উল্লেখ্য যে ৱায়ানাদ সমষ্টিত এইবাৰ বিৰোধী দলৰ সৈতে মিত্ৰতা নকৰে কংগ্ৰেছে। ইণ্ডিয়া এলায়েন্সৰ হৈ যুঁজি নিদিয়ে প্ৰিয়ংকা গান্ধীয়ে। ইণ্ডিয়া এলায়েন্সৰ হৈ সেই সমষ্টিত যুঁজ দিব কমিউনিষ্ট পাৰ্টি অৱ ইণ্ডিয়াই।
আশা কৰা অনুসৰি, এইবাৰ প্ৰিয়ংকাৰ মূল যুঁজ হ’ব বাওঁপন্থী দলৰ সৈতে।