বনভোজ খাবলৈ যোৱা মন্ত্ৰী নৱ দলে, সাংসদ প্ৰদান বৰুৱাক ‘কা’ বিৰোধীৰ ক’লা পতাকা

ৰাজ্যজুৰি নাগৰিকত্ব(সংশোধন)আইন বিৰোধী আন্দোলন অব্যাহত থকাৰ সময়তে সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদৰ কৰ্মীসকলে সোমবাৰে লখিমপুৰত সাংসদ প্ৰদান বৰুৱা আৰু মন্ত্ৰী নৱ দলেক ক’লা পতাকা দেখুৱায়।

সোমবাৰে লখিমপুৰৰ আৱৰ্ত ভৱনৰ পৰা ৰঙানদীৰ পাৰত বনভোজ খাবলৈ যোৱা বিজেপিৰ সাংসদ আৰু মন্ত্ৰী গৰাকীক আছু আৰু অসম জাতীয়তাবদী যুৱ ছাত্ৰ পৰিষদৰ সদস্য সকলে ক’লা পতাকা প্ৰদৰ্শন কৰি নাগৰিকত্ব(সংশোধন)আইনৰ বিৰুদ্ধে প্ৰতিবাদ সাব্যস্ত কৰে।

উল্লেখযোগ্য যে, নাগৰিকত্ব(সংশোধন)আইনৰ বিৰোধিতাৰে আছু আৰু অন্যান্য দল সংগঠনৰ কৰ্মীসকলে বিজেপিৰ বিধায়ক সকলক ক’লা পতাকা দেখুওৱা কাৰ্য্যসূচী অব্যাহত ৰাখিছে।

নৱ বৰ্ষৰ পহিলা দিনটোতে সৰ্থেবাৰীলৈ গৈ থকা অৱস্থাত মুখ্য মন্ত্ৰী সৰ্বানন্দ সোণোৱাল নলবাৰীত আছু কৰ্মীসকলৰ ক’লা পতাকাৰ সন্মুখিন হৈছিল।

ইয়াৰ পূৰ্বে মন্ত্ৰী হিমন্ত বিশ্ব শৰ্মা, ৰাজ্যিক বিজেপিৰ সভাপতি ৰঞ্জিত কুমাৰ দাসকে ধৰি আন বহুতো বিজেপি বিধায়ক আছু আৰু অন্যান্য জাতীয় দল সংগঠনৰ ক’লা পতাকাৰ সন্মুখিন হৈছে।