ভাৰত জোড়ো যাত্ৰাত নিৰাপত্তাৰ সংশয়! কেন্দ্ৰলৈ পত্ৰ প্ৰেৰণ কৰি উপযুক্ত সুৰক্ষা প্ৰদানৰ আহ্বান কংগ্ৰেছৰ

কংগ্ৰেছৰ শীৰ্ষস্থানীয় নেতা তথা সাংসদ ৰাহুল গান্ধীৰ নেতৃত্বত চলি থকা ভাৰত জোড়ো যাত্ৰাত দেখা দিছে নিৰাপত্তাৰ সংশয়ে! যাত্ৰাৰ সময়ত নিৰাপত্তাৰ ক্ষেত্ৰত আহি পৰা সংশয়ৰ প্ৰতি কেন্দ্ৰক সজাগ কৰি উপযুক্ত সুৰক্ষাৰ আহ্বানেৰে কেন্দ্ৰীয় গৃহমন্ত্ৰী অমিত শ্বাহলৈ পত্ৰ প্ৰেৰণ কৰিছে কংগ্ৰেছে।

গৃহমন্ত্ৰীলৈ প্ৰেৰণ কৰা পত্ৰখনত কংগ্ৰেছ নেতা কে চি ভে বেনুগোপালে কয় যে যোৱা ২৪ ডিচেম্বৰত দিল্লীত প্ৰৱেশ কৰাৰ পিছত ভাৰত জোড়ো যাত্ৰাৰ নিৰাপত্তাৰ ক্ষেত্ৰত কেইবাবাৰো আপোচ কৰা হৈছে।

পত্ৰখনত কোৱা হৈছে যে দিল্লী আৰক্ষীয়ে যাত্ৰাৰ সময়ত হোৱা অভূতপূৰ্ব ভিৰ নিয়ন্ত্ৰণ কৰাত আৰু ৰাহুল গান্ধীৰ চাৰিওফালে Z+ নিৰাপত্তাৰ দায়িত্ব বজাই ৰখাত সম্পূৰ্ণৰূপে ব্যৰ্থ হৈছে। দিল্লী আৰক্ষী যিহেতু কেন্দ্ৰীয় গৃহ মন্ত্ৰালয়ৰ অধীনস্থ সেয়ে গৃহমন্ত্ৰীলৈ প্ৰেৰণ কৰা হৈছে এই পত্ৰ।

পত্ৰখনত দিল্লী আৰক্ষীয়ে বোবা দৰ্শকৰ ৰূপত অৱতীৰ্ণ হোৱাৰ বাবে দলীয় কৰ্মী আৰু যাত্ৰাত অংশগ্ৰহণ কৰাসকলে এনে পৰিস্থিতিৰ সন্মুখীন হৈছে বুলি দাবী কৰা হৈছে। লগতে ইণ্টেলিজেন্স ব্যুৰোৱে যাত্ৰাত সংগ দিয়া লোকসকলক জেৰা কৰাৰো অভিযোগ কৰিছে পত্ৰখনত।

প্ৰতিগৰাকী ভাৰতীয়ই সমগ্ৰ দেশত বাধাহীনভাৱে চলাচল কৰাৰ অধিকাৰ আছে বুলি উল্লেখ কৰি পত্ৰখনত লগতে কোৱা হৈছে, “ভাৰত জোড়ো যাত্ৰা দেশলৈ শান্তি আৰু সম্প্ৰীতি অনাৰ এক পদযাত্ৰা। চৰকাৰে প্ৰতিশোধমূলক ৰাজনীতিত লিপ্ত হ’ব নালাগে আৰু কংগ্ৰেছ নেতাসকলৰ সুৰক্ষা আৰু নিৰাপত্তা নিশ্চিত কৰিব লাগে।”

পত্ৰখনত উন্নত নিৰাপত্তাৰ আহ্বান জনাই প্ৰাক্তন কংগ্ৰেছ নেতা তথা প্ৰধানমন্ত্ৰীদ্বয় ইন্দিৰা গান্ধী আৰু ৰাজীৱ গান্ধীৰ হত্যাৰ দিশটোও উল্লেখ কৰা হৈছে।

পত্ৰখনত কোৱা হৈছে, “আগন্তুক সময়ত ভাৰত জোড়ো যাত্ৰাই ২০২৩ চনৰ ৩ জানুৱাৰীৰ পৰা আৰম্ভ হ’বলগীয়া পৰৱৰ্তী পৰ্যায়ত পঞ্জাৱৰ লগতে জম্মু-কাশ্মীৰৰ দৰে স্পৰ্শকাতৰ ৰাজ্যত প্ৰৱেশ কৰাৰ কথা আছে।”

“এই সন্দৰ্ভত ৰাহুল গান্ধীৰ দৰে এগৰাকী Z+ সুৰক্ষা থকা ব্যক্তিৰ লগতে ভাৰত জোডো যাত্ৰাত যোগদান কৰা সকলো যাত্ৰী তথা নেতাৰ সুৰক্ষা আৰু নিৰাপত্তা নিশ্চিত কৰাৰ বাবে তাৎক্ষণিক পদক্ষেপ ল’বলৈ অনুৰোধ জনাইছো।”- পত্ৰখনত লগতে এইদৰে উল্লেখ কৰা হৈছে।