ছাত্ৰ-ছাত্ৰীসকলক প্ৰধানমন্ত্ৰীৰ ক্ষমাৰ প্ৰয়োজন নাই, তেওঁহে ক্ষমা খুজিব লাগে: ৰাহুল গান্ধী

নিট পৰীক্ষাৰ অনিয়মক লৈ প্ৰতিবাদ সাব্যস্ত কৰা ছাত্ৰ-ছাত্ৰীসকলৰ সন্দৰ্ভত প্ৰধানমন্ত্ৰী নৰেন্দ্ৰ মোদীয়ে শেহতীয়াকৈ কৰা মন্তব্যক তীব্ৰ সমালোচনা কৰিছে লোকসভাৰ বিৰোধী দলপতি তথা কংগ্ৰেছ নেতা ৰাহুল গান্ধীয়ে। শনিবাৰে ছচিয়েল মিডিয়া প্লেটফৰ্ম এক্সত এটা পোষ্ট কৰি গান্ধীয়ে অভিযোগ কৰে যে প্ৰধানমন্ত্ৰীয়ে ছাত্ৰ-ছাত্ৰী আৰু তেওঁলোকৰ পৰিয়ালৰ দুখ-কষ্ট উপলব্ধি কৰিবলৈ সম্পূৰ্ণৰূপে ব্যৰ্থ হৈছে।

ৰাহুল গান্ধীয়ে উল্লেখ কৰে যে প্ৰকৃত সমস্যাটো প্ৰতিবাদকাৰীৰ আচৰণ নহয়, বৰঞ্চ শিক্ষা ব্যৱস্থাৰ ব্যৰ্থতাহে, যাৰ বাবে হাজাৰ হাজাৰ ছাত্ৰ-ছাত্ৰীৰ ভৱিষ্যত অন্ধকাৰৰ দিশলৈ গতি কৰিছে। নিজ সন্তানৰ ভৱিষ্যতক লৈ পিতৃ-মাতৃৰ দুখতকৈ অধিক যন্ত্ৰণাদায়ক আন একো হ’ব নোৱাৰে বুলি উল্লেখ কৰি তেওঁ কয় যে হেৰাই যোৱা প্ৰতিটো যুৱ জীৱনৰ আঁৰত একোখন পৰিয়ালে কঢ়িয়াই ফুৰা যন্ত্ৰণা নিহিত হৈ থাকে, যি যন্ত্ৰণা কেতিয়াও শেষ নহয়। ফাদিল হোৱা প্ৰশ্নকাকত আৰু বাতিল হোৱা পৰীক্ষাই ছাত্ৰ-ছাত্ৰীৰ বছৰ বছৰ ধৰি কৰা প্ৰস্তুতি নিমিষতে ধ্বংস কৰি পেলাইছে বুলিও তেওঁ ক্ষোভ প্ৰকাশ কৰে। এটা অসৎ ব্যৱস্থাৰ মাজত ছাত্ৰ-ছাত্ৰীসকলক সততাৰে কাম কৰিবলৈ বাধ্য কৰোৱা হৈছে বুলি কংগ্ৰেছ নেতাগৰাকীয়ে আক্ষেপ কৰে।

প্ৰতিবাদত অংশগ্ৰহণ কৰা ছাত্ৰ-ছাত্ৰীসকলক ক্ষমা কৰি দিয়া সন্দৰ্ভত প্ৰধানমন্ত্ৰীয়ে কৰা মন্তব্যৰো তীব্ৰ বিৰোধিতা কৰে গান্ধীয়ে। তেওঁ অভিযোগ কৰে যে প্ৰধানমন্ত্ৰীয়ে এতিয়ালৈকে এগৰাকীও দুৰ্ভগীয়া পিতৃ-মাতৃ বা প্ৰশ্নকাকত ফাদিলৰ বাবে ভৱিষ্যত অন্ধকাৰ হোৱা ছাত্ৰ-ছাত্ৰীক সাক্ষাৎ কৰা নাই। ভাৰতৰ ছাত্ৰ-ছাত্ৰীক প্ৰধানমন্ত্ৰীৰ ক্ষমাৰ কোনো প্ৰয়োজন নাই, বৰঞ্চ তেওঁহে ছাত্ৰ-ছাত্ৰীৰ ওচৰত ক্ষমা খুজিব লাগে বুলি গান্ধীয়ে মন্তব্য কৰে।

উল্লেখ্য যে, শুকুৰবাৰে নিশা প্ৰধানমন্ত্ৰী মোদীয়ে ইনষ্টাগ্ৰামত এটা ভিডিঅ’ বাৰ্তা যোগে নিট প্ৰতিবাদ সন্দৰ্ভত নিজৰ মত প্ৰকাশ কৰিছিল। যন্তৰ-মন্তৰত প্ৰতিবাদকাৰীয়ে তেওঁৰ আৰু তেওঁৰ প্ৰয়াত মাতৃৰ বিৰুদ্ধে ব্যৱহাৰ কৰা আপত্তিজনক ভাষাৰ বিষয়ে জানিব পাৰি তেওঁ এই বাৰ্তা দিবলৈ বাধ্য হোৱা বুলি জানিবলৈ দিছিল। সমাজত বিৰাজমান ক্ষোভ তেওঁ বুজিব পাৰে বুলি উল্লেখ কৰি প্ৰধানমন্ত্ৰীয়ে খঙৰ পৰিৱৰ্তে সহানুভূতিৰে সঁহাৰি জনাবলৈ আহ্বান জনাইছিল। লগতে তেওঁ প্ৰতিবাদকাৰীসকলক “আমাৰ নিজৰ সন্তান” বুলি অভিহিত কৰি তেওঁলোকক আদালতৰ মজিয়ালৈ টানি নিয়া বা ৰাজহুৱা স্থানত অপমানিত কৰাৰ পৰিৱৰ্তে ক্ষমা কৰি সঠিক পথলৈ অনাটো সকলোৰে দায়িত্ব বুলি মন্তব্য কৰিছিল।

উল্লেখ্য যে ২০ জুনৰ পৰা যন্তৰ-মন্তৰত ককৰোচ জনতা পাৰ্টীৰ বেনাৰত নিট পৰীক্ষাৰ অনিয়মৰ বিৰুদ্ধে এই তীব্ৰ প্ৰতিবাদ আৰম্ভ হৈছিল। কেন্দ্ৰীয় চৰকাৰে গোটটোৰ দাবী মানি লোৱাৰ লগতে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে পদত্যাগ কৰাৰ পিছত যোৱা ২৫ জুলাইত এই প্ৰতিবাদৰ সামৰণি পৰে।