য়ুপিএছচিত উজলিল শিৱসাগৰৰ সাধাৰণ পৰিয়ালৰ সন্তান ৰাহুল কুমাৰ গুপ্তা

সদ্যঘোষিত য়ুপিএছচি পৰীক্ষাৰ ফলাফলত সফলতা লাভ কৰি  শিৱসাগৰৰ এগৰাকী মেধাৱী ছাত্ৰই জিলাখনলৈ গৌৰৱ কঢ়িয়াই আনিছে। শিৱসাগৰ নগৰৰ বাসিন্দা ওম প্ৰকাশ গুপ্তা আৰু অনিতা গুপ্তাৰ জেষ্ঠ্য সন্তান ৰাহুল কুমাৰ গুপ্তাই সৰ্বভাৰতীয় এই পৰীক্ষাত লাভ কৰা ফলাফলে সকলোকে আনন্দিত কৰি তুলিছে।

ৰাহুল কুমাৰ গুপ্তা নামৰ শিৱসাগৰৰ এই মেধাবী ছাত্ৰ জনে য়ুপিএছচিৰ পৰীক্ষাত ২৮৬ সংখ্যক স্থান লাভ কৰি অসমৰ লগতে শিৱসাগৰলৈ গৌৰৱ কঢ়িয়াই আনিছে।

ৰাহুল বৰ্তমান দিল্লীৰ জৱাহৰলাল নেহৰু বিশ্ববিদ্যালয়ৰ স্নাতকোত্তৰ চূড়ান্ত ষান্মাষিকৰ ছাত্ৰ। সম্প্ৰতি ৰাহুল আছে উত্তৰ প্ৰদেশত।পৰীক্ষাৰ ফলাফলক লৈ যথেষ্ঠ  সুখী মেধাৱী ৰাহুল।

তৃতীয়বাৰৰ প্ৰচেষ্টাত সফলতাৰ মুখ দেখা ৰাহুলৰ পিতৃ পেশাত এগৰাকী পান দোকানী। ঐতিহাসিক শিৱদ’লৰ কাষতে থকা জুনু পান দোকানৰ স্বত্বধিকাৰী ওম প্ৰকাশ গুপ্তাই একমাত্ৰ এই পান দোকানখনৰ পৰাই পাঁচজনীয়া পৰিয়ালটো পোহপাল দি আহিছে।

মেধাৱী ৰাহুলক নিজে বিচৰা ধৰণেই সহযোগ কৰি আহিছে পিতৃ মাতৃয়ে। পুত্ৰৰ এনে সাফল্যত উৎফুল্লিত এতিয়া পৰিয়ালৰ লগতে বিভিন্নজন। চেষ্টাৰ অসাধ্য যে একো নাই তাকেই এবাৰ প্ৰমাণ কৰি দেখুৱালে ৰাহুল কুমাৰ গুপ্তাই।