অসম কেৰম সন্থাৰ সভাপতি হিচাপে বিনা প্ৰতিদ্বন্দ্বিতাৰে নিৰ্বাচিত ৰকিবুল হুছেইন

অসম প্ৰদেশ কংগ্ৰেছৰ নেতা তথা ৰাজ্যৰ প্ৰাক্তন বন মন্ত্ৰী ৰকিবুল হুছেইন পুনৰবাৰ অসম কেৰম সন্থাৰ সভাপতি হিচাপে নিৰ্বাচিত হৈছে।

দেওবাৰে বিনা প্ৰতিদ্বন্দ্বিতাৰে অসম কেৰম সন্থাৰ সভাপতি হিচাপে নিৰ্বাচিত হয় চামগুৰিৰ বিধায়কগৰাকী।

উল্লেখযোগ্য যে, ৰকিবুল হুছেইনে ভাৰতীয় কেৰম ফেডাৰেশ্যনৰো সভাপতি হিচাপে কাৰ্য্যনিৰ্বাহ কৰি আছে।

অসম কেৰম সন্থাৰ সভাপতি হিচাপে নিৰ্বাচিত হোৱাৰ পাছত অনুষ্ঠিত হোৱা এখন সভাত অংশগ্ৰহণ কৰি হুছেইনে কয় যে যিকোনো খেলৰ উন্নয়ণৰ বাবে নিৰীক্ষক থকাতো দৰকাৰী।

অসমৰ প্ৰতিখন জিলাৰ পৰা অহা প্ৰতিনিধি সকলে অংশগ্ৰহণ কৰা বৈঠকখনত প্ৰাক্তন মন্ত্ৰীগৰাকীয়ে জিলা পৰ্যায়ৰ পৰা ৰাজ্যত কেৰমৰ প্ৰতিযোগিতা অনুষ্ঠিত কৰাৰ বাবে প্ৰতিনিধিসকলক আহ্বান জনায়।

ৰকিবুল হুছেইনে সভাত অসমত ৰাষ্ট্ৰীয় কেৰম প্ৰতিযোগিতা আয়োজন কৰাৰ কথাও ঘোষণা কৰে।

বিভিন্ন ক্ৰীড়া সন্থাৰ সৈতে জড়িত হৈ থকা ৰকিবুল হুছেইনে পূৰ্বে নগাঁও ক্ৰীড়া সন্থাৰ সভাপতি হিচাপেও কাৰ্য্যনিৰ্বাহ কৰিছিল।

তদুপৰি, অসম অলিম্পিক সন্থাৰ সাধাৰণ সম্পাদক হিচাপেও হুছেইনে দায়িত্বভাৰ পালন কৰিছিল।