ভাৰতীয় টিভিৰ সৰ্বকালৰ অভিলেখ ভংগ ৰামায়ণৰ

লকডাউনৰ মাজতে পুনৰ সম্প্ৰচাৰ কৰিবলৈ লোৱা ধাৰাবাহিক ৰামায়ণে জনপ্ৰিয়তাৰ লেখেৰে ভাৰতীয় টিভিৰ এক অভিলেখ ভংগ কৰিছে।

দূৰদৰ্শনৰ ডি ডি নেচনেলত দেওবাৰে হোৱা ৰামায়ণৰ সম্প্ৰচাৰ ২০১৫ চনৰ পৰা হিন্দী সাধাৰণ মনোৰঞ্জন চেনেলৰ শিতানত সৰ্বাধিক দৰ্শকে উপভোগ কৰিছে।

এই তথ্য বাৰ্ক (Broadcast Audience Research Council)-নীলচনৰ। বাৰ্কে ২০১৫ চনৰ পৰাহে টিভিৰ দৰ্শকৰ তথ্য সংগ্ৰহ কৰি আহিছে।

সেয়ে ৰামায়ণৰ পুনৰ সম্প্ৰচাৰৰ প্ৰথম দৰ্শনীৰ দৰ্শকসংখ্যা বাৰ্কৰ সংগৃ্হীত তথ্যৰ ভিতৰত সৰ্বকালৰ সৰ্বাধিক।

২৮ মাৰ্চ শনিবাৰৰ পৰা সম্প্ৰচাৰ হোৱা ধাৰাবাহিকখন দেওবাৰে গধূলি ৫.১ কোটি দৰ্শকে উপভোগ কৰিছে।

শনিবাৰে পুৱা ৯ বজাত পুনৰ সম্প্ৰচাৰৰ প্ৰথম শ্ব’টোত ৩.৪ কোটি, শনিবাৰে গধূলি ৯ বজাত ৪.৫ কোটি আৰু দেওবাৰে পুৱা ৪ কোটি লোকে দৰ্শন কৰিছে।

মেট্ৰ’সমূহকে ধৰি নগৰ অঞ্চলৰ লোকে এই মেগা ধাৰাবাহিকখন অধিক চোৱা পৰিলক্ষিত হৈছে।

অৰুণ গোভিলে ৰাম, দাৰা সিঙে হনুমানৰ চৰিত্ৰত অভিনয় কৰা ৰামানন্দ সাগৰৰ এই ধাৰাবাহিকখনে পূৰ্বেও অভূতপূৰ্ব জনপ্ৰিয়তা আৰ্জন কৰিছিল।

ধাৰাবাহিকখনৰ অভিনেতা-অভিনেত্ৰীসকলক বহুতে সাক্ষাৎ ঈশ্বৰজ্ঞান কৰিছিল আৰু ইয়াৰ দৰ্শনীৰ সময়ত ভাৰতৰ ৰাষ্টা-ঘাট জনশূন্য হৈ পৰিছিল।

কেৱল টিভিয়ে নহয়, ইউটিউবতো ৰামায়ণৰ সম্প্ৰচাৰৰ পিছৰ পৰা দূৰদৰ্শনৰ দৰ্শকসংখ্যা ১০০ শতাংশলৈকে বৃদ্ধি পাইছে।

কেৱল ৰামায়ণেই নহয় মহাকাব্য মহাভাৰত আধাৰিত আন এখন মেগা ধাৰাবাহিক মহাভাৰতৰ লগতে চুপাৰহিৰ’ কাহিনী শক্তিমান, চাৰ্কাছ, ব্যোমকেশ বক্সি আদিও দূৰদৰ্শনে পুনৰ সম্প্ৰচাৰ কৰিবলৈ লৈছে।