ৰঞ্জিৎ দত্ত সোঁৱৰণী উত্তৰ-পূব টেনিছ প্ৰতিযোগিতাৰ আয়োজন

গুৱাহাটীৰ ৰাধা গোবিন্দ বৰুৱা ক্ৰীড়া প্ৰকল্পৰ টেনিছ ক’ৰ্টত অহা ১৭ মাৰ্চৰ পৰা ২০ মাৰ্চলৈ অনুষ্ঠিত হ’ব ৰঞ্জিৎ দত্ত সোঁৱৰণী উত্তৰ-পূব টেনিছ প্ৰতিযোগিতা। ক্ৰীড়া ভাৰতীয় অসম শাখাৰ উদ্যোগত ৰেকেটছ আৰু বলছ টেনিছ সংস্থাৰ সহযোগত অনুষ্ঠিত হ’ব খেলসমূহ।

প্ৰতিযোগিতাখনত দহ বছৰ অনূৰ্ধ্বৰ মিক্সড ডাবলছ, ১২ বছৰ অনূৰ্ধ্বৰ ল’ৰাৰ ছিংগলছ, ১৪ বছৰ অনূৰ্ধ্বৰ ল’ৰা আৰু ছোৱালীৰ ছিংগলছ, ১৮ বছৰ অনূৰ্ধ্বৰ পুৰুষ শাখাত মুকলি ডাবলছ আৰু ছোৱালীৰ শাখাত ছিংগলছৰ খেলসমূহ অনুষ্ঠিত হ’ব।

সোমবাৰে অনুষ্ঠিত হোৱা এখন সংবাদমেলত উদ্যোক্তা সমিতিৰ সাধাৰণ সম্পাদক আলোক কুমাৰ ত্ৰিপাঠিয়ে প্ৰতিযোগিতাখনত ২০০ ৰ পৰা ৩০০ প্ৰতিযোগিয়ে অংশগ্ৰহণ কৰিব বুলি উল্লেখ কৰে।

আনহাতে, টেনিছ প্ৰতিযোগিতাখনৰ লগত সংগতি ৰাখি উদ্যোক্তা সমিতিয়ে ৰাজ্যৰ ভালেকেইগৰাকী ছিনিয়ৰ আৰু প্ৰাক্তন টেনিছ খেলুৱৈক সম্বৰ্ধনা জ্ঞাপন কৰিব। প্ৰতিযোগিতাখনৰ প্ৰাইজ মানি এক লাখ টকা।