নিৰ্বাচন শেষ হোৱাৰ পিছতে RBIয়ে ঘোষণা কৰিলে নতুন ৰেপো ৰেট; সকাহ পালেনে সাধাৰণ ৰাইজে?

নিৰ্বাচন শেষ হোৱাৰ পিছতে ৰিজাৰ্ভ বেংক অফ ইণ্ডিয়াই (RBI) নতুন ৰেপো ৰেট ঘোষণা কৰিলে। সাধাৰণ জনতাক সকাহ দি এইবাৰো সুতৰ হাৰ বৃদ্ধি কৰা হোৱা নাই। আকৌ ৰেপো ৰেট হ্ৰাসো কৰা নহ’ল। ইয়াৰ লগে লগে ৰিজাৰ্ভ বেংকে একেৰাহে ৮টা ত্ৰৈমাসিকলৈ ৰেপ’ ৰেট অপৰিৱৰ্তিত ৰাখিলে।

ইয়াৰ পূৰ্বে একেৰাহে ৭টা ত্ৰৈমাসিকত ৰেপ’ ৰেট বৃদ্ধি কৰা হোৱা নাছিল। কিন্তু মুদ্ৰাস্ফীতি হুৰাহুৰে বাঢ়ি আহিছিল। বহুতে ধাৰণা কৰিছিল যে ভোটদানৰ পিছত মুদ্ৰাস্ফীতি নিয়ন্ত্ৰণ কৰিবলৈ ৰিজাৰ্ভ বেংকে সুতৰ হাৰ সামান্য বৃদ্ধি কৰিব পাৰে। কিন্তু নিৰ্বাচনৰ ফলাফলৰ পিছতো সুতৰ হাৰ বৃদ্ধি কৰা নহ’ল।

লগতে পঢ়কঃ উত্তৰ পূবৰ ৩ খন ৰাজ্যত এনডিএৰ পৰাজয়ৰ বাবে কাক জগৰীয়া কৰিলে হিমন্ত বিশ্বই? সৰৱ গৌৰৱ

শুকুৰবাৰে ৰিজাৰ্ভ বেংকৰ মানিটাৰি পলিচি কমিটীৰ বৈঠকৰ অন্তত আগন্তুক ত্ৰৈমাসিকতো সুতৰ হাৰ অপৰিৱৰ্তিত থাকিব বুলি জনোৱা হয়। অৰ্থাৎ অহা তিনিমাহৰ বাবে ৰেপো ৰেট ৬.৫ শতাংশই থাকিব।

২০২২ চনৰ মে’ৰ পৰা ২০২৩ চনলৈ ৰেপ’ ৰেট ২৫০ বেছিছ পইণ্ট বৃদ্ধি পাইছে। ফলত ব্যৱসায়ীৰ পৰা ঋণ গ্ৰহণকাৰী সাধাৰণ মানুহলৈকে সকলোৱে সমস্যাৰ সন্মুখীন হ’বলগীয়া হয়। মূল্যবৃদ্ধিৰ ওপৰত নিয়ন্ত্ৰণ ৰাখিবলৈ গৈ সাধাৰণ জনতাৰ ওপৰতো আৰ্থিক চাপ বৃদ্ধি পাইছিল। ঘৰ, গাড়ীৰ ঋণৰ সুতৰ হাৰো ক্ৰমাগতভাৱে বৃদ্ধি পাইছিল।

যোৱা বছৰৰ পৰা অৱশ্যে তাৰ পৰা অলপ সকাহ আহিছে। ২০২৩-২৪ বিত্তীয় বৰ্ষত এবাৰো বৃদ্ধি হোৱা নাছিল ৰেপো ৰেট। ২০২৪-২৫ বিত্তীয় বৰ্ষৰ আৰম্ভণিতেও সুতৰ হাৰ অপৰিৱৰ্তিত ৰখাৰ সিদ্ধান্ত গ্ৰহণ কৰিছে ৰিজাৰ্ভ বেংকৰ মুদ্ৰানীতি সমিতিয়ে।

লগতে পঢ়কঃ এক্সিট প’লৰ জৰিয়তে শ্বেয়াৰ দুৰ্নীতিৰ অভিযোগ; জেপিচি দাবীৰে আৰম্ভণিতে মোডীক চাপত পেলালে ৰাহুলে!

মুদ্ৰা সমিতিৰ বৈঠকৰ অন্তত গৱৰ্ণৰ শক্তিকান্ত দাসে কয় যে ২০২২ চনত মূল্যবৃদ্ধিৰ যি আশংকাৰ সৃষ্টি হৈছিল, সেইটো বহু পৰিমাণে হ্ৰাস পাইছে। বৰ্তমান মুদ্ৰাস্ফীতিৰ হাৰ প্ৰায় ৪ শতাংশ ৰখাৰ প্ৰচেষ্টা চলোৱা হৈছে। সাধাৰণ মানুহে আৰু কোনো সমস্যাৰ সন্মুখীন হ’ব নালাগিব বুলি আশা কৰিছে শীৰ্ষ বেংকটোৱে।