বিত্তীয় জালিয়াতিৰ অভিযোগত ৰিয়েল ইষ্টেট ব্যৱসায়ৰ প্ৰতিপত্তিশীল আইকন ললিত গোয়েলক গ্ৰেপ্তাৰ

ৰিয়েল ইষ্টেট গ্ৰুপ আই.আৰ.ই.ও.-ৰ উপাধ্যক্ষ ললিত গোয়েলক এক বিত্তীয় জালিয়াতিৰ গোচৰত গ্ৰেপ্তাৰ কৰিছে এনফ’ৰ্চমেণ্ট ডাইৰেক্টৰেটে।

ৰিয়েল ইষ্টেট ব্যৱসায়ৰ প্ৰতিপত্তিশীল আইকন গোয়েলক যোৱা সপ্তাহত আমেৰিকালৈ যাত্ৰা কৰিবলৈ লোৱাৰ মুহূৰ্ততে দিল্লী বিমানবন্দৰত আটক কৰা হৈছিল। বিত্তীয় অপৰাধৰ তদন্ত কৰা এনফ’ৰ্চমেণ্ট ডাইৰেক্টৰেটে গোয়েলৰ বিৰুদ্ধে এক লুকআউট চাৰ্কুলাৰ প্ৰস্তুত কৰিছে।

এনফ’ৰ্চমেণ্ট ডাইৰেক্টৰেটৰ এজন বিষয়াই তদন্তত সহযোগ নকৰাৰ বাবে গোয়েলক গ্ৰেপ্তাৰ কৰা হয় বুলি জানিবলৈ দিয়ে।

বৈদেশিক মুদ্ৰা ব্যৱস্থাপনা আইন (FEMA) উলংঘনৰ সৈতে জড়িত এটা গোচৰৰ ওপৰত আই.আৰ.ই.ও.-ৰ তদন্ত ২০১০ চনৰ পৰা চলি আছে।

কোম্পানীটোৱে গৃহক্ৰেতাৰ ধন, বিনিয়োগ আৰু শ্বেয়াৰহোল্ডিংত ৭৭ নিযুত ডলাৰ অকৰ্তৃত্বশীল ট্ৰাষ্টলৈ স্থানান্তৰ কৰাৰ অভিযোগ আছে।

অকৰ্তৃত্বশীল ফাণ্ডৰ ওপৰত বিশ্বব্যাপী অনুসন্ধান চলা “পেণ্ডোৰা পেপাৰছ”তো ব্যৱসায়ীজনৰ নাম সাঙুৰ খাইছিল।

আনহাতে গোয়েল আৰু তেওঁৰ ব্যক্তিগত উকীলসকলে কোনো ধৰণৰ অন্যায়ৰ কথা অস্বীকাৰ কৰিছে।