সোঁৱৰক আই এম ডি টি অধ্যায়: সোণোৱালৰ প্ৰতি আছু
একালৰ সতীৰ্থ, বৰ্তমানৰ মুখ্য মন্ত্ৰী সৰ্বানন্দ সোণোৱালক শুকুৰবাৰে আই এম ডি টিৰ কাহিনী সোঁৱৰাই দিছে আছুৱে।
বিতৰ্কিত আইনখন বাতিলৰ বাবে কিয় যুঁজিছিল সেই প্ৰশ্ন নিজৰ বিৱেকক সুধিবলৈ সোণোৱালক আহ্বান জনাইছে এসময়ত তেওঁক “জাতীয় নায়ক” মুকুট পিন্ধোৱা আছুৱে।
বিদেশীৰ বাবে অনুকূলৰূপে পৰিচিত আইনখন বাতিলৰ বাবে যুঁজি এতিয়া নাগৰিকত্ব বিধেয়কৰ পক্ষ লোৱা বাবেই সোণোৱালক এই প্ৰশ্ন তেঁৱেই এৰি অহা সংগঠনটোৰ।
“কালি নাগৰিকত্ব সংশোধনী বিধেয়কৰ সপক্ষে মুখ্য মন্ত্ৰীয়ে যিখিনি বক্তব্য আগবঢ়াইছে তেওঁ নিজৰ বিৱেকক এবাৰ প্ৰশ্ন কৰি চাওক যে কিয় আই এম ডি টি আইন বাতিলৰ ক্ষেত্ৰত এসময়ত তেওঁ আপ্ৰাণ চেষ্টা কৰিছিল?” আহ্বান আছুৰ সাধাৰণ সম্পাদক লুৰিনজ্যোতি গগৈৰ।
ছাত্ৰ সমাজৰ পৰা যোৱা মুখ্য মন্ত্ৰীয়ে তেওঁৰ নিজস্বতা হেৰুৱাই তথা অসম চুক্তিক নস্যাৎ কৰি এই বিলখন জাপি দিবলৈ উঠি-পৰি লাগিছে বুলিও লুৰিনে সোণোৱালক কটাক্ষ কৰে।
গগৈয়ে লগতে কয়, ‘শ্বহীদ সকলৰ ত্যাগৰ প্ৰতি যি শ্ৰদ্ধা দেখাব লাগিছিল সেয়া কৰা নাই। নাগৰিকত্ব সংশোধনী বিলখন জাপি দিবহে বিচাৰিছে।‘
আনহাতে, একেখন সংবাদমেলতে উপস্থিত থকা আছুৰ উপদেষ্টা সমুজ্জ্বল কুমাৰ ভট্টাচাৰ্য্যই সোণোৱালক বুৰঞ্জী বিকৃত কৰা বুলি কৈ লগতে কয় ‘বুৰঞ্জী বিকৃত কৰাটো সহজ, সৃষ্টি কৰাটোহে টান।‘
‘১৯৫০ চনৰ প্ৰধান মন্ত্ৰী জৱাহৰলাল নেহৰু আৰু গৃহ মন্ত্ৰী বল্লভ ভাই পেটেলে সেইসময়ৰ শৰণাৰ্থী সকলক অসমত সংস্থাপন কৰা কথা মুখ্যমন্ত্ৰী গোপীনাথ বৰদলৈৰ ওপৰত হেঁচা দিছিল কিন্তু গোপীনাথ বৰদলৈয়ে খিলঞ্জীয়া মানুহৰ স্বাৰ্থ ৰক্ষাৰ বাবে শৰণাৰ্থীৰ বোজা অসমে নলয় বুলি স্পষ্টকৈ কৈ দিছিল।‘ সোণোৱালক এই কথা পুনৰবাৰ উনুকিয়াই দিয়ে সোণোৱালৰ একালৰ সতীৰ্থ সমুজ্জ্বল কুমাৰ ভট্টাচাৰ্য্যই।
ইপিনে, এতিয়াও প্ৰধান মন্ত্ৰী নৰেন্দ্ৰ মোডী ডাঙৰীয়াই অবৈধ বাংলাদেশী জাপি দিব বিচাৰিছে কিন্তু তাৰ বিৰুদ্ধে মুখ্যমন্ত্ৰী সৰ্বানন্দ সোণোৱালে কোনো বিৰোধিতা কৰা নাই বুলি স্পষ্টকৈ মত পোষণ কৰি ভট্টাচাৰ্য্যই লগতে কয় ‘সোণোৱালে দিল্লীৰ সুৰেৰে কথা কবলৈ আৰম্ভ কৰিছে।‘