বিশিষ্ট চিত্ৰশিল্পী, চলচ্চিত্ৰ পৰিচালক পুলক গগৈৰ দেহাৱসান; ৰাজ্যৰ শিল্প জগতত শোকৰ ছাঁ

বিশিষ্ট চিত্ৰশিল্পী, চলচ্চিত্ৰ পৰিচালক পুলক গগৈৰ দেহাৱসান ঘটিছে। শনিবাৰে পুৱা ৮.৩০ বজাত নিজ বাসগৃহতে তেওঁ শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৮৪ বছৰ।

ৰাজ্যখনৰ এগৰাকী বৰ্ষীয়ান চিত্ৰশিল্পী, বিশিষ্ট চলচ্চিত্ৰ পৰিচালক পুলক গগৈয়ে ১৯৩৮ চনত যোৰহাটত জন্মগ্ৰহণ কৰিছিল।

তেওঁ কিছুদিন ধৰি অসুস্থ হৈ আছিল। যোৱা ছেপ্টেম্বৰত তেওঁক অসুস্থ অৱস্থাত চিকিৎসাৰ বাবে জিএমচিএইচত ভৰ্তিও কৰোৱা হৈছিল। তেওঁ কিডনি ৰোগত আক্ৰান্ত হৈছিল।

দেশ-বিদেশত চিত্ৰশিল্পৰ প্ৰদৰ্শনী অনুষ্ঠিত কৰা চিত্ৰশিল্পী, কেইবাখনো জনপ্ৰিয় চলচ্চিত্ৰৰ পৰিচালক, ৰজত কমল বঁটা বিজয়ী পুলক গগৈ এগৰাকী জনপ্ৰিয় কাৰ্টুনিষ্ট হিচাপেও পৰিচিত আছিল।

পুলক গগৈয়ে পৰিচালনা কৰা কেইখনমান উল্লেখযোগ্য হৈছে খোজ, শ্ৰীময়ী মহিমাময়ী, ৰে’লৰ আলিৰ দুবৰি বন, সুৰুয, মমতাজ, সাদৰী, সেন্দূৰ, পত্নী, মৰম নদীৰ গাভৰু ঘাট আদি।

ৰে’লৰ আলিৰ দুবৰি বন ছবিখনৰ বাবে তেওঁ ৰজত কমল বঁটা লাভ কৰিছিল।

প্ৰসিদ্ধ শিল্পী, ৰাষ্ট্ৰীয় বঁটা বিজয়ী চলচ্চিত্ৰ পৰিচালকগৰাকীৰ মৃত্যুত ৰাজ্যখনৰ  শিল্প জগতত শোকৰ ছাঁ পৰিছে।