মুখ্যমন্ত্ৰীৰ ভুৱা পৰিচয়েৰে কোটি কোটি টকাৰ প্ৰৱঞ্চনা, অৰুণাচল আৰক্ষীৰ জালত ঋষিৰাজ বৰকটকী আৰু পত্নী শ্ৰুতি বৰকটকী

অসমৰ এহাল স্বামী-স্ত্ৰী শেহতীয়াকৈ এক বৃহৎ ধন আত্মসাৎ আৰু প্ৰৱঞ্চনাৰ গোচৰত অৰুণাচল প্ৰদেশ আৰক্ষীৰ হাতত গ্ৰেপ্তাৰ হৈছে। ঋষিৰাজ বৰকটকী আৰু তেওঁৰ পত্নী শ্ৰুতি বৰকটকীক আৰক্ষীয়ে এই জালিয়াতিৰ অভিযোগত গ্ৰেপ্তাৰ কৰিছে। ইফালে, ঋষিৰাজ বৰকটকীৰ বিৰুদ্ধে গুৱাহাটীৰ দিছপুৰ আৰক্ষী থানাত পুনৰ এখন নতুন এজাহাৰ দাখিল কৰা হৈছে। এই নতুন গোচৰটোত আন এজন ব্যক্তিয়ে তেওঁক চাৰে ছয় কোটি টকা প্ৰৱঞ্চনা কৰাৰ অভিযোগ উত্থাপন কৰিছে।

এই সমগ্ৰ ঘটনাৰ তদন্ত তেতিয়াই আৰম্ভ হয় যেতিয়া ৰাজেশ আগৰৱালা নামৰ এজন ব্যৱসায়ীয়ে বান্দৰদেৱা আৰক্ষী থানাত এক অভিযোগ দাখিল কৰে। অভিযোগ অনুসৰি, তেওঁক প্ৰায় চৌত্ৰিশ কোটি তেত্ৰিছ লাখ টকাৰ প্ৰৱঞ্চনা কৰা হৈছিল। আৰক্ষীয়ে জানিবলৈ দিয়া মতে, ঋষিৰাজে নিজকে এজন প্ৰভাৱশালী ব্যৱসায়ী হিচাপে চিনাকি দিছিল আৰু ভুক্তভোগীগৰাকীক অসমত এটা এক্সট্ৰা নিউট্ৰেল এলকহল প্ৰকল্পত ধন বিনিয়োগ কৰিবলৈ সৈমান কৰিছিল।

মানুহৰ বিশ্বাস জয় কৰিবলৈ ঋষিৰাজে কেন্দ্ৰীয় বিত্ত মন্ত্ৰালয়ৰ অধীনৰ ৰাজহ বিভাগ আৰু কেবিনেট সচিবালয়ৰ ভুৱা নথিপত্ৰও ব্যৱহাৰ কৰিছিল। কেৱল সেয়াই নহয়, তেওঁ নিজৰ ৰাজনৈতিক সম্পৰ্ক থকা বুলি মিছা দাবী কৰিছিল আৰু ডিজিটেল পৰিচয়ৰো অপব্যৱহাৰ কৰিছিল। তদন্তকাৰী বিষয়াসকলে আৱিষ্কাৰ কৰে যে ঋষিৰাজে এটা ভুৱা হোৱাটছএপ একাউণ্ট চলাইছিল য‘ত অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ ফটো ব্যৱহাৰ কৰা হৈছিল। তেওঁ আন কেইবাজনো ডাঙৰ ৰাজনৈতিক নেতাৰ সৈতে থকা ভুৱা ফটো শ্বেয়াৰ কৰি মানুহৰ বিশ্বাস অৰ্জন কৰিছিল।

এই ভুৱা প্ৰতিশ্ৰুতিত ভোল গৈ ভুক্তভোগী ব্যৱসায়ীজনে ২০২২ চনৰ পৰা বিভিন্ন পৰ্যায়ত মুঠ ৩৪,৩৩,৩৪,৩৭৩ টকা ঋষিৰাজলৈ হস্তান্তৰ কৰিছিল। আৰক্ষীয়ে অভিযান চলাই ঋষিৰাজৰ পৰা পাঁচটা ম‘বাইল ফোন আৰু প্ৰায় ডেৰ কোটি টকা মূল্যৰ এখন বিলাসী বাহন জব্দ কৰে। ইয়াৰ পিছত তেওঁক য়ুপিয়াৰ আদালতত হাজিৰ কৰোৱা হয় আৰু আৰক্ষীৰ জিম্মালৈ প্ৰেৰণ কৰা হয়।

আৰক্ষীৰ অনুসন্ধানত পোহৰলৈ আহে যে প্ৰৱঞ্চনাৰে আহৰণ কৰা এই বৃহৎ পৰিমাণৰ ধন বিভিন্ন সহযোগী, পৰিয়ালৰ সদস্য আৰু ব্যৱসায়িক প্ৰতিষ্ঠানৰ বেংক একাউণ্টলৈ পঠিওৱা হৈছিল। বৰ্তমান আৰক্ষীয়ে এই সকলোবোৰ একাউণ্টৰ বিতং পৰীক্ষা চলাই আছে। আনহাতে, আৰক্ষীয়ে গুৱাহাটীৰ চিৰিয়াখানা পথত থকা স্পেনিছ গাৰ্ডেনৰ পৰা ঋষিৰাজৰ পত্নী শ্ৰুতি বৰকটকীকো গ্ৰেপ্তাৰ কৰে। অভিযোগ অনুসৰি, তেওঁ অৰুণাচল প্ৰদেশত থকা এটা ভুৱা কোম্পানীৰ স্বত্বাধিকাৰী আছিল আৰু এই কোম্পানীটোক সমগ্ৰ প্ৰৱঞ্চনাৰ কাম-কাজ চলাবলৈ এটা মাধ্যম হিচাপে ব্যৱহাৰ কৰা হৈছিল।