বিহাৰৰ বিৰোধী নেতাই ক’লে- ‘মোৰ ঘৰটো Covid-19ৰ পৰীক্ষণ কেন্দ্ৰ কৰক’
ক’ৰ’না ভাইৰাছ সংক্ৰমণৰ ভয়াবহতাৰ প্ৰতি লক্ষ্য ৰাখি বিহাৰ বিধানসভাৰ বিৰোধী দলপতি তেজস্বী প্ৰসাদ যাদৱে ১, পল’ ৰোডস্থিত চৰকাৰী আৱাসগৃহটি কোৱাৰেনটাইন কেম্প নাইবা Covid-19ৰ পৰীক্ষণ কেন্দ্ৰ কৰিবলৈ ৰাজ্য চৰকাৰক প্ৰদান কৰাৰ ইচ্ছা প্ৰকাশ কৰিছে।
ইয়াৰ উপৰি আৰ জে দি নেতাগৰাকীয়ে টুইটাৰযোগে নিজৰ এমাহৰ দৰমহা মুখ্য মন্ত্ৰীৰ সাহায্য পুঁজিলৈ দিয়াৰ কথাও ঘোষণা কৰে।
স্বাস্থ্য বিভাগৰ তথ্য অনুসৰি দেওবাৰলৈকে ৰাজ্যৰ ১৪৩ গৰাকী লোকৰ ভিতৰত দুগৰাকীৰ দেহত ক’ৰ’না ভাইৰাছ ধৰা পৰিছে। ইয়াৰে এজন ৩৮ বছৰীয়া লোকৰ ২১ মাৰ্চ অৰ্থাৎ শনিবাৰে পাটনাস্থিত AIIMSত মৃত্যু হয় আৰু আনজনৰ চিকিৎসা চলি আছে।
‘বিৰোধীৰ দলপতি হিচাপে ১, পল’ ৰোডস্থিত চৰকাৰী আৱাসগৃহটি মোক দিয়া হৈছিল। কিন্তু মই ঘৰটিৰ সঠিক ব্যৱহাৰ হোৱাটো বিচাৰো’, যাদৱে টুইটত এই কথা কয়।
তেওঁ লগতে কয়, ‘আৱাসগৃহটি কোৱাৰেনটাইন কেম্প নাইবা পৰীক্ষণ কেন্দ্ৰ অথবা আছুতীয়া ৱাৰ্ড হিচাপে ব্যৱহাৰ কৰিব পাৰে। তদুপৰি এই দুৰ্যোগ সময়ত অইন কাৰণতো এই আৱাসগৃহটি ব্যৱহাৰ কৰিব পাৰিব’।
উল্লেখ্য যে উপ মুখ্য মন্ত্ৰী গৰাকীয়ে এই দুৰ্যোগৰ সময়ত চৰকাৰে গ্ৰহণ কৰা প্ৰত্যেকটো সিদ্ধান্তকে সমৰ্থন কৰি যাব বুলিও উল্লেখ কৰে।
ইয়াৰ উপৰি নেতাজনে ৰাজ্যখনৰ সকলো লোককে সংযম বজাই ৰখাৰ লগতে সাৱধানতা অৱলম্বন কৰাৰ বাবে অনুৰোধ জনায়।