ৰোহিত শৰ্মাই ২০২১ টি-২০ বিশ্বকাপত ভাৰতক নেতৃত্ব দিব লাগে; অৱসৰ গ্ৰহণ কৰাৰ পাছতে পাৰ্থিৱ পেটেলৰ মন্তব্য

সকলো ধৰণৰ ঘৰুৱা, আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰাৰ পাছতে মুখ খুলিছে ভাৰতীয় ক্ৰিকেট দলৰ প্ৰাক্তন উইকেটৰক্ষক বেটছমেন পাৰ্থিৱ পেটেলে।

ভাৰতীয় ক্ৰিকেট দলৰ অধিনায়কত্ব সম্পৰ্কত মত প্ৰকাশ কৰি পাৰ্থিৱ পেটেলে কয় যে, ২০২১ চনৰ টি-২০ বিশ্বকাপত ৰোহিত শৰ্মাই ভাৰতীয় ক্ৰিকেট দলক নেতৃত্ব দিব লাগে।

‘‘ৰোহিত শৰ্মাই আমাক কেনেদৰে দল এটা গঠন কৰিব লাগে আৰু কেনেদৰে প্ৰতিযোগিতা জিকিব লাগে সেয়া দেখুৱাইছে। মই ভাবো ৰোহিতক টি-২০ৰ অধিনায়কত্বৰ ভাৰ অৰ্পন কৰিলে কোনো ক্ষতি নহয়,’’ পাৰ্থিৱ পেলেটে লগতে কয়।

উল্লেখযোগ্য, গুজৰাটত জন্মলাভ কৰা ক্ৰিকেটাৰ গৰাকীয়ে বুধবাৰে সকলো ধৰণৰ ক্ৰিকেটৰ পৰা অৱসৰ গ্ৰহণ কৰাৰ আনুষ্ঠানিক ঘোষণা কৰে।

পাৰ্থিৱ পেটেল ভাৰতীয় ক্ৰিকেট দলৰ সৰ্বকনিষ্ঠ উইকেটৰক্ষক বেটছমেন হিচাপে ভাৰতীয় দলত অভিষেক ঘটাইছিল।

মহেন্দ্ৰ সিং ধোনীৰ আন্তঃৰাষ্ট্ৰীয় ক্ৰিকেটত আত্মপ্ৰকাশৰ পাছতে পাৰ্থিৱ পেটেলৰ ক্ৰিকেট কেৰিয়াৰ প্ৰায় অনিয়মীয়া হৈ পৰে যদিও পেটেলে গুজৰাট ৰঞ্জি দলক নেতৃত্ব প্ৰদান কৰি বিজয়ী কৰোৱাত গুৰুত্বপূৰ্ণ ভূমিকা পালন কৰিছিল।