কোনবোৰ দেশ বন্ধু নহয়, ৰাছিয়াই প্ৰস্তুত কৰিলে ইয়াৰ তালিকা! কোন কোন আছে তালিকাত?

ৰাছিয়া-ইউক্ৰেইন যুদ্ধই প্ৰায় দুসপ্তাহ স্পৰ্শ কৰিবলৈ আগবাঢ়িছে। ৰাছিয়ান সেনাই এতিয়াও ইউক্ৰেইনৰ ৰাজধানী কীয়েভ দখল কৰিব পৰা নাই। ৰাষ্ট্ৰসংঘৰ লগতে সমগ্ৰ বিশ্ব এই যুদ্ধক লৈ উদ্বিগ্ন। কিদৰে যুদ্ধ নিৰসন কৰিব পৰা যায় তাৰ বাবে প্ৰচেষ্টাও অব্যাহত আছে।

ইয়াৰ মাজতে মস্কোই কোনবোৰ দেশ ৰাছিয়াৰ বন্ধু নহয়, তাৰ তালিকা প্ৰস্তুত কৰাত মনোনিৱেশ কৰিছে।

বাতৰি অনুসৰি, সোমবাৰে ৰাছিয়াৰ তৰফৰ পৰা জানিবলৈ দিয়া হৈছে যে যিবোৰ দেশে ৰাছিয়াৰ সৈতে ‘অ-বন্ধুসুলভ আচৰণ’ কৰিছে তেওঁলোকৰ এখন তালিকা প্ৰস্তুত কৰা হৈছে। এতিয়াৰে পৰা সেই দেশসমূহৰ কোনো সংস্থা বা ব্যক্তিৰ সৈতে যিকোনো ধৰণৰ বাণিজ্যিক চুক্তি কৰিবলৈ হ’লে চৰকাৰৰ অনুমতি ল’ব লাগিব।

ইউক্ৰেইনৰ বিৰুদ্ধে ৰাছিয়াৰ সামৰিক অভিযানৰ বিৰুদ্ধে বহু দেশেই আপত্তি দৰ্শাইছে। বহু দেশেই বাস্তৱত ৰাছিয়াৰ বিৰুদ্ধে ইউক্ৰেইনলৈ সেনা পঠোৱা নাই যদিও যুদ্ধৰ বিৰোধিতা কৰি দেশখনৰ বিৰুদ্ধে অৰ্থনৈতিক নিষেধাজ্ঞা জাৰি কৰিছে। এনে পৰিপ্ৰেক্ষিতত ৰাছিয়াই তেওঁলোকৰ নতুন নীতি গ্ৰহণ কৰিছে।

ৰাছিয়াৰ ‘অ-বন্ধু দেশৰ’ তালিকাত কোন কোন আছে? মস্কো প্ৰশাসনে জানিবলৈ দিয়া মতে এই তালিকাত ইউক্ৰেইন, আমেৰিকা তথা ইউৰোপীয় ইউনিয়নৰ দেশসমূহৰ উপৰিও আছে জাপান, ছিংগাপুৰ, তাইৱান, আলবেনিয়া, অষ্ট্ৰেলিয়া, ব্ৰিটেইন, কানাডা, আইচলেণ্ড, নিউজিলেণ্ড আৰু দক্ষিণ কোৰিয়াৰ দৰে বহুকেইখন দেশ।

ৰাছিয়াই আৰম্ভ কৰা যুদ্ধখনত বিৰোধিতা কৰা প্ৰায়বোৰ দেশকেই এই তালিকাত অন্তৰ্ভুক্ত কৰা হৈছে।