কাটাৰত স্বৰ্ণ অৰ্জন উত্তৰ-পূবৰ তাৰকা ভাৰোত্তোলক মীৰাবাঈ চানুৰ

ষষ্ঠ কাটাৰ ইণ্টাৰনেচনেল কাপৰ মহিলাৰ ৪৯ কেজি শাখাত শুকুৰবাৰে স্বৰ্ণপদক দখল কৰিবলৈ সক্ষম হৈছে উত্তৰ-পূবৰ তাৰকা ভাৰোত্তোলক তথা পূৰ্বৰ বিশ্ব চেম্পিয়ন ছায়খাম মীৰাবাঈ চানুৱে।

প্ৰতিযোগিতাখনত মণিপুৰত জন্মগ্ৰহণ কৰা ২৫ বছৰীয়া ভাৰোত্তোলকগৰাকীয়ে মুঠ ১৯৪ কেজি ভাৰ উত্তোলন কৰি স্বৰ্ণপদক জয় কৰে।

মীৰাবায়ে শুকুৰবাৰে প্ৰতিযোগিতাখনত ক্লীন এণ্ড জাৰ্কত প্ৰথম প্ৰচেষ্টাতে ১১১ কেজি ভাৰ উত্তোলন কৰে যদিও স্নেটচ ইভেণ্টত দ্বিতীয় প্ৰচেষ্টাত ৮৩ কেজি ভাৰ উত্তোলন কৰে।

প্ৰতিযোগিতাখনত ফ্ৰাস্নৰ প্ৰতিযোগি দুগৰাকীয়ে ক্ৰমে ৰূপৰ আৰু ব্ৰঞ্জৰ পদক জয় কৰে।

উল্লেখযোগ্য যে, আঘাতৰ ফলত দীৰ্ঘদিনৰ বাবে খেলত অংশগ্ৰহণৰ পৰা আতৰি থাকিবলগীয়া হোৱা মীৰাবায়ে চলিত বৰ্ষৰ ফেব্ৰুৱাৰি মাহত প্ৰত্যাৱৰ্তন কৰিছিল।

ককাঁলৰ আঘাতত আক্ৰান্ত হোৱা উত্তৰ-পূবৰ তাৰকা ভাৰোত্তোলত গৰাকীয়ে এছিয়ান গেইমছ আৰু ২০১৮ বৰ্ষৰ বিশ্ব চেম্পিয়নশ্বিপতো অংশগ্ৰহণ কৰিব পৰা নাছিল।

দীৰ্ঘদিনৰ চিকিৎসা গ্ৰহণ কৰি সুস্থ হৈ উঠা মীৰাবাঈ প্ৰত্যাৱৰ্তন কৰিয়ে পদক দখল কৰিবলৈ সক্ষম হৈছিল যদিও এতিয়ালৈ নিজৰ পূৰ্ব শ্ৰেষ্ঠ প্ৰদৰ্শন স্পৰ্শ কৰিব পৰা নায়।

আনহাতে, স্বৰ্ণ পদক দখল কৰাৰ পাছত উৎফুল্লিত খেলুৱৈ গৰাকীয়ে দেশৰ বাবে পদক দখল কৰিব পোৱাটো সদায় গৌৰৱৰ বিষয় বুলি উল্লেখ কৰি পৰৱৰ্তী সময়ত ব্যক্তিগত প্ৰদৰ্শনৰ আৰু উন্নতি কৰাৰ বাবে চেষ্টা চলাব বুলি মন্তব্য কৰে।