সুশান্ত সিং ৰাজপুত আত্মহত্যাৰ গোচৰত এইবাৰ সঞ্জয় লীলা ভাঞ্চালীক মুম্বাই আৰক্ষীৰ চমন

বলীউদৰ জনপ্ৰিয় অভিনেতা সুশান্ত সিং ৰাজপুতৰ আত্মহত্যাৰ গোচৰত ধাৰাবাহিকভাৱে চলচ্চিত্ৰ জগতৰ তাৰকাক জেৰা কৰি থকা হৈছে।

বিগত কিছুদিন ধৰি এই ঘটনাত প্ৰায় ৩০জন লোকৰ ভাষ্য লিপিবদ্ধ কৰা হৈছে।

এইবাৰ মুম্বাই আৰক্ষীয়ে এই গোচৰত বলীউদৰ এগৰাকী ব্যতিক্ৰমী পৰিচালক হিচাপে পৰিচিত চলচ্চিত্ৰ নিৰ্মাতা সঞ্জয় লীলা ভাঞ্চালীলৈকেও চমন জাৰি কৰিছে।

বাতৰি অনুসৰি, এই গোচৰৰ ৰহস্য উদ্ঘাটনৰ নিমিত্তে লাগি থকা মুম্বাই আৰক্ষীয়ে পৰিচালক সঞ্জয় লীলা ভাঞ্চালীক মাতি পঠিয়াইছে।

কিয়নো ‘ৰাম লীলা’নামৰ ছবিখনত প্ৰথমতে সুশান্ত সিং ৰাজপুতক নিৰ্বাচিত কৰা হৈছিল যদিও পাছত ৰণবীৰ সিঙক ছবিখনৰ মূল চৰিত্ৰত অভিনয় কৰিবলৈ দিয়ে।

আৰক্ষীয়ে এই সালসলনিৰ কাৰণ সম্পৰ্কে সঞ্জয় লীলা ভাঞ্চালীক সোধপোছ কৰিব। আৰক্ষীয়ে এইক্ষেত্ৰত যশৰাজ ফিল্মছৰ পৰা কিবা হেচা আহিছিল নেকি সেয়া জানিবলৈ চেষ্টা কৰিব।

জানিব পৰা মতে, ‘ৰাম লীলা’ আৰু ‘বাজীৰাও মস্তানী’কলৈয়ো তেওঁক সোধপোছ কৰা হ’ব।

সূত্ৰসমূহৰ মতে, ‘ৰাম লীলা’ আৰু ‘বাজীৰাও মস্তানী’ৰ ভূমিকা চৰিত্ৰত সুশান্তে অভিনয় কৰাৰ কথা আছিল কিন্তু যশৰাজৰ চুক্তিৰ বাবে সুশান্চে এই ছবি কৰিব নোৱাৰিলে যাক লৈ সুশান্ত আৰু যশৰাজৰ মাজত সম্পৰ্কৰ অৱনতি ঘটিছিল।