ছিকিম বিধানসভাত বিৰোধীৰ আসন খালী; গণতন্ত্ৰৰ বাবে দুৰ্ভাগ্যজনক আখ্যা মুখ্য মন্ত্ৰীৰ
২৯ জুলাই অৰ্থাৎ সোমবাৰৰ পৰা আৰম্ভ হৈছে ছিকিম বিধানসভাৰ বাজেট অধিৱেশন। কিন্তু এইবাৰৰ বাজেট অধিৱেশন কিছু পৰিমানে তাৎপৰ্যপূৰ্ণ হিচাপে বিবেচিত হৈছে কিয়নো বিধানসভাৰ বিৰোধীৰ আসন সমূহ সম্পূৰ্ণৰূপে খালী।
উল্লেখ্য যে চলিত বাজেট অধিৱেশনৰ পৰা আঁতৰি থকাৰ সিদ্ধান্ত গ্ৰহণ কৰিছে বিৰোধী দল ছিকিম ডেম’ক্ৰেটিক ফ্ৰণ্ট চমুকৈ এছ ডি এফে। বিৰোধীৰ এই সিদ্ধান্তই এতিয়া বিধানসভাৰ মজিয়াৰ লগতে চৌদিশে ব্যাপক প্ৰতিক্ৰিয়াৰ সৃষ্টি কৰিছে।
বিৰোধীৰ উপস্থিতি শূণ্য সন্দৰ্ভত ৰাজ্যখনৰ মুখ্য মন্ত্ৰী প্ৰেম সিং তামাং(গোলে)এ দুৰ্ভাগ্যজনক আখ্য দিছে। তেওঁ কয় যে সদনৰ মজিয়াত বিৰোধীৰ দায়িত্ব নিয়াৰিকৈ পালন কৰাৰ বিপৰীতে এইদৰে উপস্থিত নথকা কাৰ্য সুস্থ গণতন্ত্ৰৰ বাবে দুৰ্ভাগ্যজনক।
মঙলবাৰে বিধানসভাত মুখ্য মন্ত্ৰীয়ে কয়, ‘বিৰোধীৰ দায়িত্ব নিয়াৰিকৈ পালন কৰাটো বিৰোধীৰ পৰা আমি বিচাৰো। কিন্তু বিধানসভাত তেওঁলোকৰ অনুপস্থিতি গণতন্ত্ৰৰ বাবে দুৰ্ভাগ্যজনক লগতে জনসাধাৰণৰ ৰায়ক অপমান’।
ইফালে বিৰোধীৰ অনুপস্থিতি সম্পৰ্কে বিভিন্ন বিতৰ্ক তথা কথা-বতৰা চলি থকাৰ সময়তে মঙলবাৰে দুজন এছ ডি এফৰ বিধায়ক বিধানসভাত উপস্থিত হোৱা কাৰ্যত আঁচৰিত হৈ পৰে সকলো। দলৰ সিদ্ধান্তৰ বিপৰীতে গৈ দুজন বিধায়ক ক্ৰমে জি টি ধুংগেল আৰু ই এম প্ৰসাদে বাজেট অধিৱেশনত অংশ লয়।
অধিৱেশনত অংশ লোৱা দুয়োগৰাকী বিধায়কে স্পষ্ট ৰূপত কয় যে জনসাধাৰণৰ হৈ যাতে আমি কাম কৰিব পাৰো তাৰ বাবেই ৰাইজে ভোট দি জয়ী কৰাইছে আৰু সেয়ে আমি বাজেট অধিৱেশনত উপস্থিত থকাৰ সিদ্ধান্ত লৈছো।
অধিৱেশন অন্ত পৰাৰ পিছত সাংবাদিকে সোধা প্ৰশ্নৰ উত্তৰত উজনি টাডঙৰ বিধায়ক জি টি ধুংগেলে কয় যে অধিৱেশনত অংশ লোৱা মানে এইটো নহয় যে আমি দলৰ বিৰোধিতা কৰিছো, সকলোৰে নিজা নিজা দৃষ্টিভংগী আছে।
‘আমাক ৰাইজে ভোট দি বিধানসভালৈ প্ৰেৰণ কৰিছে। সেয়ে আমি জনসাধাৰণৰ বাবে চলিত বাজেট অধিৱেশনত অংশ লৈছো’। এইদৰে কয় ধুংগেলে।
আনহাতে নামছেবঙৰ বিধায়ক ই এম প্ৰসাদেও ৰাইজৰ স্বাৰ্থৰ বাবে বাজেট অধিৱেশনত অংশ লোৱাৰ কথা স্বীকাৰ কৰে।
তেওঁ কয়, ‘দল এৰাৰ কোনো প্ৰশ্নই নুঠে। আমি অধিৱেশনত ৰাইজৰ হৈ এচ ডি এফৰ বি হিচাপে বেলেগ আসনত বহিছো। আমাৰ বিৰুদ্ধে কিবা অনুশাসনমূলক ব্যৱস্থা লয় নে নলয় সেয়া দলৰ সভাপতিৰ হাতত আছে’।
ইয়াৰ উপৰি বিৰোধী উপস্থিত নথকা কাৰ্যক সচেতন মহলৰ লগতে বিভিন্ন জনে এছ ডি এফক তীব্ৰ সমালোচনা কৰাৰ পিছতেই এই বিধায়ক দুজনে অধিৱেশনত উপস্থিত থকাৰ সিদ্ধান্ত গ্ৰহণ কৰে বুলিও জনায়।
ইফালে দলৰ বিপৰীতে ৰাইজৰ স্বাৰ্থৰ হকে বিধানসভাৰ মজিয়াত উপস্থিত হোৱা এছ ডি এফৰ দুয়োজন বিধায়ককে ৰাজ্যৰ মুখ্য মন্ত্ৰী প্ৰেম সিঙে ধন্যবাদ জ্ঞাপন কৰে।