কাইলৈ প্ৰথম পৰ্যায়ৰ ভোটগ্ৰহণ; ভোটাৰ কাৰ্ড নাথাকিলেও দিব পাৰিব ভোট, কেনেকৈ?

শনিবাৰে, ২৭ মাৰ্চৰ পৰা ৰাজ্যত বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণ আৰম্ভ হ’ব। তিনিটা পৰ্যয়ত অনুষ্ঠিত হ’ব এই ভোট গ্ৰহণ। ৰাজ্যখনত মুঠ ১২৬টা বিধানসভা সমষ্টি আছে। অহা ২ মে’ত ঘোষণা কৰা হ’ব নিৰ্বাচনৰ ফলাফল।

নিৰ্বাচন আয়োগে জানিবলৈ দিছে যে এইবাৰ ভোটাৰ কাৰ্ড নাথাকিলেও ভোট দিব পাৰিব। কিন্তু ইয়াৰ পৰিৱৰ্তে কোনো প্ৰামান্য নথি প্ৰদৰ্শন কৰিব লাগিব।

ভোটদান কৰিবলৈ হ’লে আন কি কি নথি দেখুৱাব পাৰিব সেয়া চাই লওকঃ-

• আধাৰ কাৰ্ড আৰু পান কাৰ্ড দেখালেও ভোট দিব পাৰিব। ড্ৰাইভিং লাইচেন্স থাকিলেও দিব পাৰিব ভোট।
• এমএনৰেগাৰ (১০০দিনৰ কামৰ) বাবে দিয়া কাৰ্ড দেখুৱাইও ভোট দিব পাৰিব। আনকি, শ্ৰম মন্ত্ৰ্যালয়ে দিয়া হেলথ স্মাৰ্ট কাৰ্ড দেখুৱাইও ভোট দিব পাৰিব।
• পাছপোৰ্ট থাকিলে ভোট দিব পাৰিব। এন পি আৰৰ অধীনত আৰ জি আইৰ দ্বাৰা দিয়া স্মাৰ্ট কাৰ্ড দেখুৱাইও ভোট দিব পৰা যাব।
• বেংক বা পোষ্ট অফিচৰ পাছবুকত যদি ভোটাৰৰ ফটো থাকে, তেতিয়াও সেয়া দেখুৱাই ভোট দিব পাৰিব। ফটো থকা এনেকুৱা পেন্সনৰ কাগজ দেখুৱালেও ভোট দিব পাৰিব।
• কেন্দ্ৰ, ৰাজ্য, ৰাজহুৱা খণ্ডৰ বা পাব্লিক লিমিটেড সংস্থাই দিয়া ফটোযুক্ত পৰিচয় পত্ৰ দেখুৱাইও ভোট দিব পাৰিব।
• সাংসদ, বিধায়ক, পৰিষদীয় সদস্যই দিয়া চৰকাৰী পৰিচয় পত্ৰ দেখুৱালেও ভোট দিব পাৰিব।