আজি মুকলি আকাশৰ তললৈ অহাৰ বাট মুকলি হ’ব বীৰ লাচিত সেনাৰ নেতা শৃংখল চলিহাৰ

গ্ৰেপ্তাৰ কৰাৰ পৰা ১৯ দিনৰ পাছত আজি মুকলি আকাশৰ তললৈ অহাৰ বাট মুকলি হ’ব বীৰ লাচিত সেনাৰ সাংগঠনিক সাধাৰণ সম্পাদক শৃংখল চলিহাৰ।

শনিবাৰে চলিহাৰ অধিবক্তাই গুৱাহাটী উচ্চ ন্যায়ালয়ত পুনৰবাৰ জামিন বিচাৰি আবেদন জনাব।

“কাইলৈ আমি উচ্চ ন্যায়ালয়ত জামিন আবেদন কৰিম।কাইলৈ শৃংখল  মুকলি আকাশৰ তললৈ  আহিব পাৰিব বুলি আশা কৰিছো,’’ নৰ্থ ইষ্ট নাওৰ সাংবাদিকৰ আগত শুকুৰবাৰে এইদৰে কয় শৃংখল চলিহাৰ হৈ ওকালতি কৰা অধিবক্তা উপমন্যু হাজৰিকাই।

“পানবজাৰ থানাৰ গোচৰৰ আটাইতকৈ আশ্বৰ্যজনক কথাটো হ’ল যে ১৬ ডিচেম্বৰৰ এখন এজাহাৰ য’ত শৃংখল চলিহাৰ নামেই উল্লেখ নাই সেই এজাহাৰৰ ভিত্তিত শৃংখলক গ্ৰেপ্তাৰ কৰিছে।এজাহাৰখনত শৃংখলৰ বিপৰীতে নাম আছিল কৃষক মুক্তিৰ কেইজনমান নেতাৰহে,” অধিবক্তা হাজৰিকাই লগতে কয়।

ইপিনে, নৰ্থ ইষ্ট নাওলৈ প্ৰেৰণ কৰা এক প্ৰেছ বিজ্ঞপ্তিত তেওঁ কয়  “বৃহস্পতিবাৰে হোৱা এক শুনানিৰ পাছত উচ্চ ন্যায়ালয়ে জামিনৰ নির্দেশ দিলে শৃংখলা চলিহাক। ইতিমধ্যেই চৰকাৰী পক্ষই যেতিয়া দেখিলে যে, শৃংখল জামিনত মুক্ত হবলৈ গৈ আছে তেওঁলোকে ষড়যন্ত্ৰমূলক  ভাৱে এটা দ্বিতীয় পুৰণা গোচৰত শৃংখলক গ্ৰেপ্তাৰ কৰি বৰপেটা কাৰাগাৰৰ পৰা পানবজাৰ আৰক্ষী থানালৈ লৈ আহি ন্যায়ালয়ত হাজিৰ কৰায়।’’

আজিৰ এই শুনানিত উপমান্যু হাজৰিকাই তীব্র প্ৰতিবাদ কৰা বুলি উল্লেখ কৰি তেওঁ কয়  “বিভিন্ন উচ্চতম ন্যায়ালয়ৰ ৰায়দান আদালতত দাখিল কৰাত কোৰ্ট সন্তুষ্ট হয় আৰু ন্যায়িক দণ্ডাধীশে শৃংখল চলিহাক নতুন গোচৰত গ্ৰেপ্তাৰ কৰা বিষয়টো নাকচ  কৰিলে।”

আনহাতে, এই গোচৰটো আৰক্ষীৰ অপৰাধ শাখাই দাখিল কৰা বুলি হাজৰিকাই উল্লেখ কৰি লগতে কয় “ন্যায়াধীশ গৰাকীয়ে নাকচ কৰি আদালতত মন্তব্য দিয়ে যে অপৰাধ শাখাই কোনো নতুন প্ৰমাণ আৰু তথ্য দাখিল কৰিব নোৱাৰিলে।”

শৃংখলা চলিহা উজনি অসমৰ CAAবিৰোধী আন্দোলনৰ এজন শীৰ্ষ নেতা  হিচাপে বিশেষ ভূমিকা লোৱাৰ বাবেই তেওঁ ভবিষ্যতে ৰাজনৈতিক ক্ষেত্ৰখনলৈ ভাবুকি কঢ়িয়াই আনিব পাৰে বুলি ভাবি চৰকাৰে তেওঁক বেআইনীভাৱে মুখ বন্ধৰ বাবে দীঘলীয়াকৈ কাৰাগাৰত বন্দী কৰাৰ ষড়যন্ত্ৰ কৰিছিল বুলিও অধিবক্তা হাজৰিকাই বিজ্ঞপ্তিত উল্লেখ।

তেওঁ আৰু কয় “আমি গম পোৱা মতে ষড়যন্ত্ৰৰ ৰচিতা চান্দা সম্ৰাট মুখ্য মন্ত্ৰী সৰ্বানন্দ সোণোৱালৰ লগতে আৰু গুপ্তহত্যাৰ নায়ক অতিৰিক্ত সঞ্চালক প্ৰধান ভি.পি সিং।”

উল্লেখযোগ্য যে, CAA-বিৰোধী আন্দোলনৰ মাজতে কেইবাটাও অভিযোগত ২৩ ডিচেম্বৰত শৃংখল চলিহাক আৰক্ষীয়ে গ্ৰেপ্তাৰ কৰিছিল।

২৪ ডিচেম্বৰত চি আই ডিয়ে তেওঁক ১৪ দিনৰ জিম্মাত বিচাৰিছিল যদিও দুদিনৰ বাবেহে জিম্মাত দিছিল। তাৰ পাছত ২৬ ডিচেম্বৰৰ দিনা চি আই ডিয়ে পাঁচদিনৰ জিম্মাত বিচৰাত পুনৰ দুদিনৰ বাবে জিম্মাত দিছিল।

শৃংখল চলিহাৰ বিৰুদ্ধে ধাৰা নং- 120B121/121A/122/123/147/148/150/153/153A/326/333/353-ৰ অধীনত চি আই ডিয়ে 30/19 নম্বৰৰ এটা গোচৰ ৰুজু কৰিছিল।