ভাৰতত ধৰ্মান্তৰকৰণৰ চেষ্টা চলোৱাৰ গুৰুতৰ অভিযোগ! তিনিগৰাকী মাৰ্কিন নাগৰিকক ততাতৈয়াকৈ দেশ এৰাৰ নিৰ্দেশ

ভাৰতলৈ আহি খ্ৰীষ্টান ধৰ্মলৈ ধৰ্মান্তৰিত কৰাৰ চেষ্টা চলোৱাৰ এক গুৰুতৰ অভিযোগ উঠিছে তিনিগৰাকী মাৰ্কিন বা আমেৰিকান নাগৰিকৰ বিৰুদ্ধে। এই অভিযোগৰ পিছতেই লগে লগে কঠোৰ পদক্ষেপ গ্ৰহণ কৰিছে মহাৰাষ্ট্ৰৰ পুনে আৰক্ষীয়ে। আৰক্ষীয়ে অতি ক্ষীপ্ৰতাৰে ব্যৱস্থা গ্ৰহণ কৰি তিনিওগৰাকী অভিযুক্তক অতি শীঘ্ৰে দেশ এৰি যোৱাৰ নিৰ্দেশ দিছে। এই চাঞ্চল্যকাৰী ঘটনাটো মূলতঃ পুনে চহৰত সংঘটিত হৈছে।

আৰক্ষীয়ে জানিবলৈ দিয়া মতে, অভিযুক্ত তিনিগৰাকী বিদেশী নাগৰিকৰ বয়স ক্ৰমে ৫৩, ৬৫ আৰু ৬৬ বছৰ। যোৱা ১৯ ৰ পৰা ২১ এপ্ৰিলৰ ভিতৰত তেওঁলোক পৰ্যটকৰ ভিছা বা টুৰিষ্ট ভিছাত ভাৰতলৈ আহিছিল। অভিযোগ অনুসৰি, ভাৰতলৈ আহিয়েই তেওঁলোকে বিভিন্ন ধৰ্মীয় সামগ্ৰী আৰু প্ৰচাৰপত্ৰ বিতৰণ কৰিবলৈ আৰম্ভ কৰে। ইয়াৰ লগতে খ্ৰীষ্টান ধৰ্ম প্ৰচাৰৰ উদ্দেশ্যে তেওঁলোকে স্থানীয় লোকসকলৰ সৈতে মত বিনিময় কৰাতো লিপ্ত হৈছিল। টুৰিষ্ট ভিছাত ভাৰতলৈ আহি ধৰ্মীয় প্ৰচাৰ আৰু শিক্ষাদানৰ কামত জড়িত হৈ পৰি তেওঁলোকে ভিছাৰ চৰ্তাৱলী উলংঘা কৰা বুলি জানিব পাৰিয়েই প্ৰশাসনে এই দ্ৰুত পদক্ষেপ গ্ৰহণ কৰে।

সমগ্ৰ ঘটনাটো পোহৰলৈ আহে যোৱা ২৭ এপ্ৰিল তাৰিখে পুনেৰ পেঠ অঞ্চলত সংঘটিত হোৱা এটি ঘটনাৰ জৰিয়তে। জানিব পৰা মতে, উক্ত তিনিগৰাকী লোকে এজন বেচৰকাৰী কেব বা টেক্সি চালকৰ ওচৰলৈ গৈ তেওঁক ইংৰাজী, হিন্দী আৰু মাৰাঠী আদিকে ধৰি বিভিন্ন ভাষাত লিখা ধৰ্মীয় প্ৰচাৰপত্ৰ অৰ্পণ কৰিছিল। চালকজনক তেওঁলোকৰ ধৰ্মীয় বিশ্বাস গ্ৰহণ কৰিবলৈ প্ৰৰোচিত কৰাৰো অভিযোগ উঠিছে এই লোককেইজনৰ বিৰুদ্ধে। ইয়াৰ পিছতেই সেই সচেতন টেক্সি চালকজনে আৰক্ষীৰ ওচৰত অভিযোগ দাখিল কৰে। চালকজনৰ অভিযোগৰ ভিত্তিত আৰক্ষীয়ে তিনিওগৰাকী বিদেশী নাগৰিকক স্থানীয় থানালৈ লৈ যায় আৰু তাত সংশ্লিষ্ট বিষয়াসকলে তেওঁলোকৰ ভিছা পৰীক্ষা কৰে। তদন্তকাৰী বিষয়া সকলে জনোৱা অনুসৰি, তেওঁলোকৰ ব্যক্তিগত বস্তু-বাহানি তালাচী কৰি বিভিন্ন খ্ৰীষ্টান ধৰ্মীয় প্ৰচাৰৰ নথিপত্ৰ উদ্ধাৰ কৰা হৈছে। টুৰিষ্ট ভিছাৰ চৰ্ত উলংঘা কৰাৰ অপৰাধত তেওঁলোকক লিভ ইণ্ডিয়া বা ভাৰত এৰাৰ জাননী প্ৰদান কৰা হৈছে আৰু অহা ১০ মে’, ২০২৬ তাৰিখৰ নিৰ্ধাৰিত সময়সীমাৰ ভিতৰত তেওঁলোকক নিজ দেশলৈ উভতি যোৱাৰ কঠোৰ নিৰ্দেশ দিয়া হৈছে।