মোদী বিৰোধিতাৰ ফল! প্ৰয়াগৰাজত পবিত্ৰ স্নানত বাধা শংকৰাচাৰ্যক; মাটিত বগৰাই সাধুক কৰিলে প্ৰহাৰ

দেওবাৰে প্ৰয়াগৰাজৰ মাঘী মেলাত অপ্ৰীতিকৰ পৰিস্থিতি। মৌনি অমৱস্যাৰ দিনা পবিত্ৰ স্নান কৰিবলৈ গৈছিল শংকৰাচাৰ্য স্বামী অভিমুক্তেশ্বৰানন্দ। শংকৰাচাৰ্যৰ পাল্কি আৱদ্ধ কৰি দিয়াৰ উপৰিও তেওঁৰ শিষ্যসকলক তীব্ৰ প্ৰহাৰ কৰাৰ অভিযোগ উত্থাপন হৈছে।

ইয়াতেই শেষ নহয়। হিন্দুত্ববাদীৰ ‘পোষ্টাৰবয়’ যোগী আদিত্যনাথৰ আৰক্ষীয়ে সাধু-সন্তসকলক চুলিত ধৰি মাটিত বগৰাই মাৰপিট কৰে। সংগমৰ পৰা বলপূৰ্বক পাল্কি আঁতৰাই দিয়া হৈছে ।

ইতিমধ্যে ইয়াৰ লগত জড়িত কেইবাখনো ছবি আৰু ভিডিঅ’ ভাইৰেল হৈছে। তাত দেখা গৈছে যে আৰক্ষী আৰু স্থানীয় একাংশ লোকে পাল্কি টানি লৈ গৈছে। তাৰে এজনৰ কঁকালত আকৌ পিষ্টল বান্ধি ৰখা আছে। অলপ আঁতৰত আৰক্ষীয়ে এজন সাধুক চুলিত ধৰি টানি মাটিত চোঁচৰাই লৈ গৈছে। তেওঁৰ কাপোৰবোৰ প্ৰায় খুলি গৈছে। লগতে তেওঁক চৰ-থাপ্পৰ মাৰি থকা হৈছে।

অযোধ্যাৰ ৰাম মন্দিৰৰ পৰা পেহেলগাম আক্ৰমণ। অভিমুক্তেশ্বৰানন্দই প্ৰধানমন্ত্ৰী নৰেন্দ্ৰ মোডীক বিভিন্ন বিষয়ত বাৰে বাৰে সমালোচনা কৰি আহিছে। দীৰ্ঘদিন ধৰি তেওঁ বিজেপিৰ চকুৰ কূটা হৈ পৰিছে। সেই ক্ষোভৰ বাবেই এই ঘটনা সংঘটিত হোৱা বুলি দাবী কৰিছে বিৰোধী শিবিৰে। কংগ্ৰেছে ইয়াক তীব্ৰ গৰিহণা দিছে। তেওঁলোকে কয় যে শংকৰাচাৰ্যক অপমান কৰাৰ বাবে উত্তৰ প্ৰদেশ চৰকাৰে ক্ষমা খুজিব লাগে।

দেওবাৰে শংকৰাচাৰ্যৰ পাল্কিখন হঠাৎ আটক কৰি তেওঁক খোজকাঢ়ি সংগমলৈ যাবলৈ কোৱা হয়। ইয়াৰ পিছতে আৰক্ষী আৰু শংকৰাচাৰ্যৰ শিষ্যৰ মাজত সংঘাত আৰম্ভ হয়। ইয়াৰ ফলত আৰক্ষীয়ে কেইবাজনো সাধুক গ্ৰেপ্তাৰ কৰে। বহুতকে তীব্ৰ প্ৰহাৰ কৰা হৈছিল।

প্ৰয়াগৰাজৰ জিলা দণ্ডাধীশ মনীষ কুমাৰ ভাৰ্মাই স্পষ্ট কৰি দিয়ে যে শংকৰাচাৰ্যই অনুমতি অবিহনে পাল্কি আনিছিল। বিপুল জনসমাগম আছিল। তেওঁৰ সমৰ্থকসকলে বেৰিকেড ভাঙি পেলায়। আৰক্ষীৰ লগত হতাহতিত লিপ্ত হয়। সমগ্ৰ বিষয়টোৰ তদন্ত চলি আছে।