শ্বীনা বৰা হত্যাকাণ্ড: সাত বছৰৰ মূৰত মুকলি আকাশৰ তললৈ ইন্দ্ৰাণী মুখাৰ্জী

কন্যা হত্যাৰ গোচৰত কাৰাৰুদ্ধ হৈ থকা ইন্দ্ৰাণী মুখাৰ্জীয়ে অৱশেষত সাত বছৰৰ মূৰত মুকলি আকাশৰ তললৈ ওলাই আহিল।

১৮ মে’ত উচ্চতম ন্যায়ালয়ে জামিন মঞ্জুৰ কৰাৰ পিছতে কালি ইন্দ্ৰাণীক মুক্তি দিব লাগিছিল যদিও কাগজ পত্ৰ সঠিক সময়ত জমা দিব নোৱাৰাত কালি তেওঁক কাৰাগাৰৰ পৰা মুক্তি দিয়া হোৱা নাছিল।

২০১৫ চনৰ পৰা মুম্বাইৰ কাৰাগাৰত বন্দী হৈ থকা ইন্দ্ৰাণী মুখাৰ্জীয়ে আজি অৱশ্যে কাৰাগাৰৰ পৰা ওলাই আহিবলৈ সক্ষম হয়।

চিবিআইৰ বিশেষ আদালতে জামিন নাকচ কৰাৰ পিছত চলিত বৰ্ষৰ ফেব্ৰুৱাৰী মাহত ইন্দ্ৰাণীয়ে উচ্চতম ন্যায়ালয়ৰ কাষ চাপিছিল। অৱশেষত উচ্চতম ন্যায়ালয়ে তেওঁৰ জামিন মঞ্জুৰ কৰিছিল।

ইন্দ্ৰাণী মুখাৰ্জীয়ে যাতে দেশ এৰি নাযায় বা সাক্ষীৰ সৈতে যোগাযোগ নকৰে সেই চৰ্তত আদালতে তেওঁক জামিন মঞ্জুৰ কৰা হৈছিল।

উচ্চতম ন্যায়ালয়ৰ ন্যায়াধীশ এল নাগেশ্বৰ ৰাওৰ নেতৃত্বত তিনিজনীয়া বিচাৰপীঠে কৈছিল যে শ্বীনা বৰা হত্যাকাণ্ড গোচৰৰ বিচাৰ সোনকালেই সম্পূৰ্ণ কৰা সম্ভৱ নহ’ব।বিচাৰপীঠে জামিন মঞ্জুৰ কৰাৰ সময়ত কয়, “আবেদনকাৰীৰ বিৰুদ্ধে উত্থাপিত অভিযোগ হ’ল যে তেওঁ পিটাৰ মুখাৰ্জী আৰু তেওঁৰ আগৰ পত্নীৰ পুত্ৰ ৰাহুল মুখাৰ্জীৰ সৈতে তেওঁৰ জীৰ লিভ-ইন সম্পৰ্কৰ প্ৰতি লক্ষ্য ৰাখি হত্যাৰ পৰিকল্পনা কৰিছিল।”

 চিবিআইৰ এখন বিশেষ আদালতে কেইবাবাৰো মুখাৰ্জীৰ জামিন প্ৰত্যাখ্যান কৰিছিল।
২০১২ চনৰ এপ্ৰিলত ইন্দ্ৰাণী মুখাৰ্জী, তেওঁৰ তেতিয়াৰ গাড়ীচালক শ্যামবৰ ৰায় আৰু প্ৰাক্তন স্বামী সঞ্জীৱ খান্নাই ২৪ বছৰীয়া শ্বীনা বৰাক হত্যা কৰাৰ অভিযোগ উত্থাপন হৈছিল।