অনা অসমীয়াৰ দাদাগিৰি! : আজি ১২ ঘন্টীয়া বন্ধত স্তব্ধ শিৱসাগৰ

অনা অসমীয়া ব্যৱসায়ীয়ে অসমীয়া অসমীয়া জাতিক সাঙুৰি গালি পৰা ঘটনাৰ প্ৰতিবাদত মঙলবাৰে সাতটাকৈ সংগঠনে আহ্বান দিয়া ১২ ঘন্টীয়া শিৱসাগৰ বন্ধত স্বাভাৱিক জীৱন-যাত্ৰা ব্যহত হৈ পৰিছে। বন্ধ সমৰ্থনকাৰী সংগঠনকেইটাৰ কৰ্মীয়ে ৰাজপথত টায়াৰ জ্বলাই প্ৰতিবাদ সাৱ্যস্ত কৰে।

এই বন্ধৰ ফলত শিৱসাগৰত যান-বাহনৰ চলাচলকে ধৰি সকলো ব্যৱসায়িক অনুষ্ঠান-প্ৰতিষ্ঠান বন্ধ হৈ পৰিছে।

উল্লেখযোগ্য যে যোৱা ৩০ জানুৱাৰিত শিৱসাগৰৰ মাৰোৱাৰী পট্টীৰ আশাৰাম বাগৰী নামৰ ব্যৱসায়িক প্ৰতিষ্ঠানত চিলাৰায় দিৱসৰ বাবে বৰঙণি বিচাৰি যোৱা কোচ ৰাজবংশী ছাত্ৰ সন্থাৰ সদস্যক শাৰীৰিকভাৱে অপদস্থ কৰাৰ লগতে অসমীয়া জাতিক লৈ অপমান সুচক মন্তব্য কৰাক লৈ সোমবাৰে পুনৰ নগৰখনত এক উত্তেজনাময় পৰিৱেশৰ সৃষ্টি হৈছিল।

উক্ত ঘটনা সন্দৰ্ভত সোমবাৰে শিৱসাগৰ আৰক্ষীয়ে বীৰ লাচিত সেনাৰ শৃংখল চলিহা, আমছুৰ ইউনিচ তামুলী আৰু চিতু নামৰ তিনিগৰাকী যুৱকক গ্ৰেপ্তাৰ কৰি কাৰাগাৰলৈ প্ৰেৰণ কৰাক কেন্দ্ৰ কৰি বহুকেইটা দল-সংগঠনৰ নেতা কৰ্মীয়ে আদালতৰ চৌহদত অৰ্ধ উলংগ হৈ তীব্ৰ প্ৰতিবাদ সাব্যস্ত কৰিছিল।

আনহাতে, আৰক্ষী থানাত অনা অসমীয়া ব্যৱসায়ীজনক ক্ষমা খুজোৱাই মীমাংসা কৰাৰ পাছত যুৱক কেইজনক আৰক্ষীয়ে গ্ৰেপ্তাৰ কৰি কাৰাগাৰলৈ প্ৰেৰণ কৰা কাৰ্যত দল-সংগঠনকেইটা ক্ষুব্ধ হৈ পৰে।

আৰক্ষীৰ ভূমিকাত খৰ্গহস্ত হৈ পৰা দল-সংগঠনে একত্ৰিতভাৱে আজি ১২ ঘণ্টীয়া শিৱসাগৰ জিলা বন্ধৰ আহ্বান জনাইছিল। বীৰ লাচিত সেনা, আহোম সেনা, আমছু, আক্ৰাছু,অসম জাতীয়তাবাদী যুৱ পৰিষদ, সদৌ অসম উন্নয়ন পৰিষদ আৰু কলিতা ছাত্ৰ সন্থাই যৌথভাবে আহ্বান কৰা কৰা বন্ধৰ ফলত আজি সমগ্ৰ শিৱসাগৰ জিলা সম্পূৰ্ণৰূপে বন্ধ হৈ পৰিছে।