চাৰি আঞ্চলিক শক্তিৰে গঠিত ছিকিম প্ৰগ্ৰেছিভ এলায়েন্সৰ প্ৰথমখন প্ৰাৰ্থীৰ তালিকা ঘোষণা

ৰাষ্ট্ৰীয় শক্তিক পৰাভূত কৰাৰ উদ্দেশ্যেৰে যোৱা ১৩ মাৰ্চত ছিকিমৰ চাৰিটা আঞ্চলিক ৰাজনৈতিক দল একত্ৰিত হৈ গঠন কৰা ছিকিম প্ৰগ্ৰেছিভ এলায়েন্সে ৰাজ্যখনত হ’ব লগীয়া বিধানসভা আৰু লোকসভা নিৰ্বাচনৰ বাবে আজি প্ৰথমখন ৯জনীয়া প্ৰাৰ্থীৰ তালিকা প্ৰকাশ কৰিছে।

প্ৰকাশিত প্ৰথমখন তালিকা অনুসৰি ছিকিমৰ একমাত্ৰ লোকসভা আসনখনৰ বাবে প্ৰতিদ্বন্দ্বিতা আগবঢ়াব ছিকিম য়ুনাইটেড ফ্ৰণ্টৰ অধ্যক্ষ নৰেন্দ্ৰ অধিকাৰীয়ে। আনহাতে বিধানসভা নিৰ্বাচনৰ বাবে ৰঙাং-য়াঙিয়াং সমষ্টিৰ পৰা বৰ্তমানৰ বিধায়ক তথা ছিকিম ৰাজ্য মঞ্চৰ অধ্যক্ষ আৰ এন চামলিং আৰু ছিকিম নেশ্যনেল পিপল’ছ পাৰ্টীৰ অধ্যক্ষ দিলে নামগিয়াল বাৰফুংপাই গেংটকৰ পৰা প্ৰতিদ্বন্দ্বিতা আগবঢ়াব।

আনহাতে ছিকিম সংগ্ৰাম পৰিষদৰ তাৰা ভট্টৰায়ে উজনি টাডং সমষ্টি, ছিকিম নেশ্যনেল পিপলছ পাৰ্টীৰ বিকাশ দৰ্জিয়ে পশ্চিম পেণ্ডাম সমষ্টি আৰু গোপাল খাতিৱাৰাই খামডং-চিংটাম সমষ্টি, ছিকিম ৰাজ্য মঞ্চীৰ ফিপ্ৰাহাং চুব্বাই নামচেইবং সমষ্টি আৰু দাতেম্পা চেৰপাই দৰমদিন সমষ্টি আৰু ছিকিম য়ুনাইটেড ফ্ৰণ্টৰ ৰমেশ খনালে ৰেনক বিধানসভা সমষ্টিৰ পৰা নিৰ্বাচনত অৱতীৰ্ণ হ’ব।

ছিকিম সংগ্ৰাম পৰিষদৰ অধ্যক্ষ তথা প্ৰাক্তন সাংসদ ডি কে ভাণ্ডাৰীয়ে সংবাদমেলত প্ৰকাশ কৰে যে ছিকিমৰ সামগ্ৰিক উন্নয়ন তথা ছিকিমবাসীৰ আশা পূৰণ কৰাৰ লক্ষ্য লৈয়ে আমি চাৰিটা আঞ্চলিক শক্তি ক্রমে ছিকিম নেশ্যনেল পিপলছ পাৰ্টী, ছিকিম ৰাজ্য মঞ্চী, ছিকিম য়ুনাইটেড ফ্ৰণ্ট আৰু ছিকিম সংগ্ৰাম পৰিষদ লগ লাগি ছিকিম প্ৰগ্ৰেছিভ এলায়েন্স গঠন কৰিছো।

আনহাতে ছিকিম ৰাজ্য মঞ্চৰ অধ্যক্ষ তথা মিত্ৰজোঁটৰ মুখ্য আহ্বায়ক আৰ এন চামলিঙে কয়, ‘এই নিৰ্বাচনৰ বাবে আমি সম্পূৰ্ণৰূপে সাজু হৈছো। এইবাৰৰ নিৰ্বাচনত ছিকিম প্ৰগ্ৰেছিভ এলায়েন্স ছিকিমবাসীৰ বাবে হ’ব শক্তিশালী বিকল্প। আমি ছিকিম তথা ইয়াৰ জনসাধাৰণৰ বাবে কাম কৰিম’।

ইফালে ছিকিমৰ জনসাধাৰণৰ স্বাৰ্থ লাঘৱ হোৱা কোনো কাম এলায়েন্সে নকৰে বুলিও চামলিঙে মন্তব্য কৰে।