প্ৰথম ছেট হেৰুৱাইও দুৰ্দান্ত প্ৰত্যাৱৰ্তন! একেৰাহে দ্বিতীয়বাৰৰ বাবে উইম্বলডন খিতাপ জয় ছিনাৰৰ

উইম্বলডনৰ চেণ্টাৰ ক’ৰ্টত পুনৰ য়ানিক ছিনাৰৰ ৰাজত্ব। আলেকজেণ্ডাৰ জেৰেভৰ কঠিন প্ৰত্যাহ্বান মোকাবিলা কৰি একেৰাহে দ্বিতীয়বাৰৰ বাবে খিতাপ অক্ষুণ্ণ ৰাখিছে বিশ্বৰ এক নম্বৰ খেলুৱৈগৰাকীয়ে।

প্ৰথম ছেটত পৰাস্ত হোৱাৰ পিছতো দেওবাৰে মেগা ফাইনেলত তেওঁ এক আচৰিত প্ৰত্যাৱৰ্তন কৰে। তিনি ঘণ্টা ৪৬ মিনিটৰ মাৰাথন যুঁজত ২৪ বছৰীয়া ইটালীৰ ৰিয়ানে জেৰেভক ৬-৭(৭), ৭-৬(২), ৬-৩, ৬-৪ ব্যৱধানত পৰাস্ত কৰে।

এয়া তেওঁৰ কেৰিয়াৰৰ পঞ্চমটো গ্ৰেণ্ড শ্লেম আৰু ৩০ সংখ্যক ট্ৰফী। ফ্ৰেঞ্চ অ’পেনত জুয়ান মেনুৱেল চেৰুণ্ডোলোৰ হাতত অভাৱনীয় পৰাজয়ৰ হতাশা চম্ভালি তেওঁ লণ্ডনলৈ আহিছিল।

প্ৰথম ছেটত দুয়োগৰাকী তাৰকাই নিজৰ চাৰ্ভিছৰ আধিপত্য দেখুৱাইছিল। কোনো ব্ৰেক পইণ্ট নোহোৱাকৈ খেলখন টাই ব্ৰেকলৈ গৈছিল। তাত ৭-৭ৰ স্ক’ৰৰ পিছত শেহতীয়াকৈ ফ্ৰেঞ্চ অ’পেন জয় কৰা জেৰেভে দুৰ্দান্ত ফৰহেণ্ড উইনাৰত প্ৰথমটো ছেট আজুৰি নিয়ে। ২০২৫ চনৰ ভিয়েনা অ’পেনৰ পিছত একেৰাহে ১৪টা ছেটৰ পৰাজয়ৰ ধাৰা ভাঙি ছিনাৰৰ বিৰুদ্ধে এইটোৱেই আছিল প্ৰথম এটা ছেট জয়।

প্ৰথম চেটটো হাৰিছিল যদিও ছিনাৰৰ শৰীৰৰ ভাষাত কোনো অস্থিৰতা নাছিল। দ্বিতীয় ছেটতো তেওঁ নিজৰ পৰিচিত শান্ত মেজাজেৰে যুঁজ দি থাকিল। এই পৰ্যায়তো দুয়োজন খেলুৱৈয়ে নিজৰ চাৰ্ভৰ ওপৰত অটল আছিল। নিখুঁত চাৰ্ভ আৰু বুদ্ধিদীপ্ত উইনাৰত বাৰে বাৰে বিপদমুক্ত হৈছিল জেৰেভ। ফলত দ্বিতীয় ছেটটোও টাই ব্ৰেকলৈ হয়।

অৱশ্যে এইবাৰ ইটালীৰ তাৰকাগৰাকীয়ে আৰু কোনো ভুল নকৰিলে। জেৰেভৰ একেৰাহে কেইবাটাও ভুলৰ সুযোগ লৈ তেওঁ টাই ব্ৰেকক ৭-২ ব্যৱধানত নিজৰ পক্ষত আনে। জেৰেভে এটা বেকহেণ্ড শ্বট ক’ৰ্টৰ বাহিৰলৈ পঠিয়াই দিয়াৰ লগে লগেই দুঘণ্টা আঠ মিনিটৰ পাছত বর্তমানৰ চেম্পিয়নগৰাকীয়ে মেচখন ১-১ ব্যৱধানত সমতালৈ ঘূৰাই আনে৷ নিজৰ স্নায়ু চাপ নিয়ন্ত্ৰণত ৰাখি ছিনাৰে নিজৰ মগজুৰে মনটোক চেম্পিয়নৰ দৰে ব্যৱহাৰ কৰিছিল।

তৃতীয় ছেটতে সলনি হ’ল মেচখনৰ ভাগ্য। আঢ়ৈ ঘণ্টাৰ পাছতো কোনেও কাৰো চাৰ্ভ ভাঙিব পৰা নাছিল। সেই মুহূৰ্ততে এটা বল ত শ্বট ল’বলৈ গৈ জেৰেভ ঘাঁহনিৰ ক’ৰ্টত পিছলি পৰিল। সোঁ আঁঠুত আঘাত পোৱাৰ ফলত তেওঁৰ বিষ হৈছিল। ক্ৰীড়াসুলভ মনোভাৱ দেখুৱাই ছিনাৰে লগে লগে নেট পাৰ হৈ তেওঁৰ ওচৰলৈ দৌৰি গ’ল। ইয়াৰ পিছত খেল আৰম্ভ হ’ল যদিও জেৰেভৰ ছন্দ ঘুৰি অহা দেখা নগ’ল।

সেই সুযোগ কামত লগাই ছিনাৰে ৪০-১৫ ব্যৱধানত পিছ পৰি থকাৰ পিছতো তীব্ৰ আক্ৰমণ চলাই প্ৰথমবাৰ চাৰ্ভিছ ব্ৰেক কৰে। তাৰ পিছত, তেওঁ নিজৰ চাৰ্ভ ধৰি ৰাখি তৃতীয় ছেটত ৬-৩ ব্যৱধানত জয়লাভ কৰি খিতাপৰ কাষ চাপিল। এই ছেটতে বিশ্বৰ শ্ৰেষ্ঠ তাৰকাগৰাকীয়ে যেন মেচখনৰ ওপৰত সম্পূৰ্ণ নিয়ন্ত্ৰণ ল’লে।

চতুৰ্থ ছেটতো জেৰেভে তীব্ৰ যুঁজ দিছিল। ফ্ৰেঞ্চ অ’পেনৰ চেম্পিয়নগৰাকীয়ে কেইবাটাও ব্ৰেক পইণ্ট ৰক্ষা কৰি মেচখন পঞ্চম ছেটলৈ লৈ যোৱাৰ যৎপৰোনাস্তি চেষ্টা কৰে। কিন্তু তেতিয়ালৈকে ছিনাৰৰ আত্মবিশ্বাস তুংগত উঠিছিল। যেতিয়া স্ক’ৰ ৩-৩ আছিল, তেতিয়া ইটালীৰ তাৰকাগৰাকীয়ে একেৰাহে দুটা ব্ৰেক পইণ্ট হেৰুৱাইও হাৰ নামানিল।

অৱশেষত তেওঁ অনবদ্য ফৰহেণ্ড উইনাৰত মূল্যৱান ব্ৰেক লাভ কৰে। তাৰ পিছত ছিনাৰে নিজৰ চাৰ্ভিচ গেমত কোনো ভুল নকৰি ছেট আৰু মেচখন ৬-৪ ব্যৱধানত জয়লাভ কৰি গ্ৰাছ ক’ৰ্টত শুই পৰে।

অ’পেন যুগত পিট ছাম্প্ৰাছ, ৰজাৰ ফেডাৰেৰ আৰু ন’ভাক জ’কভিচৰ পিছত ছিনাৰ উইম্বলডনৰ খিতাপ অক্ষুণ্ণ ৰখা চতুৰ্থজন বিশ্বৰ এক নম্বৰ খেলুৱৈ হিচাপে পৰিগণিত হয়। ইয়াৰ লগে লগে তেওঁ অল ইংলেণ্ড ক্লাবত একেৰাহে ১৪খন মেচত জয়লাভ কৰে। ইয়াৰ উপৰিও তেওঁ ১০০ সংখ্যক গ্ৰেণ্ড শ্লেম খিতাপও সম্পূৰ্ণ কৰে। তদুপৰি, ইটালীৰ তাৰকাগৰাকীয়ে জেৰেভৰ বিৰুদ্ধে একেৰাহে ১০খন মেচত জয়লাভ কৰি নিজৰ অবিশ্বাস্য আধিপত্য বজাই ৰাখিলে।