চিত্ৰঙৰ সংহাৰত ৩৫ জনে প্ৰাণ হেৰুৱালে বাংলাদেশত, হাজাৰ হাজাৰ লোক গৃহহাৰা

ঘণ্টাত ১০০ কিলোমিটাৰৰো অধিক বেগত বোৱা চিত্ৰঙ ঘূৰ্ণীৰ কৱলত পৰি বাংলাদেশত মৃত্যু ঘটিছে ৩৫ জন লোকৰ। চৰকাৰী সূত্ৰই এই কথা প্ৰকাশ কৰিছে।

বাংলাদেশৰ উপকূলীয় এলেকাত বহু গছ-গছনি উভালি পৰিছে। ব্যাহত হৈ পৰিছে যোগাযোগ আৰু বিদ্যুৎ যোগান
দক্ষিণ-পশ্চিম চট্টগ্ৰাম উপকূলৰ পৰা সৰ্বাধিক মৃত্যুৰ খবৰ পোৱা গৈছে। বংগোপসাগৰত এখন বালি ভৰ্তি ড্ৰেজাৰ ডুবি আঠজন শ্ৰমিকৰ মৃত্যু ঘটে।

কুমিলাত গছ বাগৰি পৰাৰ ফলত এটা তিনিজনীয়া পৰিয়ালৰ – পিতৃ-মাতৃ আৰু তেওঁলোকৰ নাবালক সন্তানৰ মৃত্যু ঘটে। চিটাগং জিলাৰ পৰা এটা শিশুৰ মৃতদেহ উদ্ধাৰ কৰা হৈছে। চিৰাজগঞ্জ জিলাৰ যমুনা নদীত ধুমুহাৰ সময়ত নাও ডুবি যোৱাৰ ফলত এগৰাকী মাতৃ আৰু তেওঁৰ দুবছৰীয়া পুত্ৰৰ মৃত্যু হয়।

আনহাতে গোপালগঞ্জ জিলাত গছ বাগৰি পৰাৰ ফলত দুগৰাকী মহিলাৰ মৃত্যু হয়। বাংলাদেশৰ চৰকাৰে যুদ্ধকালীন তৎপৰতাৰে উদ্ধাৰ অভিযান অব্যাহত ৰাখিছে।