আৰক্ষীৰ অভিযানত আটক গোলাঘাটৰ সুৰা চুৰি কাণ্ডৰ লগত জড়িত ছয়জন

চুবুৰীয়া কাৰ্বি আংলং আৰু নাগালেণ্ডক কেন্দ্ৰ কৰি গোলাঘাট জিলাৰ পৰা এচাম অপৰাধীয়ে  বিভিন্ন অপৰাধমূলক কাৰ্যকলাপ চলাই থকাৰ বাতৰি সংবাদ মাধ্যমত পৰিবেশন হৈ আহিছে।

বিগত কিছুদিন পূৰ্বে নিশাটোৰ ভিতৰত লাখপতি হোৱাৰ বাবে চিনেমাৰ কৌশলেৰে  ছয়জনীয়া চোৰৰ চক্ৰ এটাই গুৱাহাটীৰ পৰা যোৰহাট অভিমুখী দুখন সুৰাভৰ্তি ট্ৰাক অপহৰণ কৰি ট্ৰাকত থকা সুৰাখিনি বিক্রী কৰাৰ এক বৃহৎ ঘটনা পোহৰলৈ আহে।

ইতিমধ্যে, গোলাঘাট আৰক্ষীয়ে গ্ৰেপ্তাৰ কৰা চুৰিকাণ্ডটোৰ মূল ব্যক্তিকেইজন হল–অভিজিত বৰা, আমজাদ খান, চামছুদ্দিন আহমেদ ওৰফে ৰাজু, শান্তি হাতীবৰুৱা,ৰাজা কলিতা আৰু সুৰেন কুমাৰ তেজৱাল। গোলাঘাটৰ ভাৰপ্ৰাপ্ত আৰক্ষী বিষয়া দীপক বৰাই  ঘটনা সন্দৰ্ভত দিয়া তথ্য অনুসৰি বিগত ৬ মার্চত গুৱাহাটীৰ গড়চুক অঞ্চলৰ পৰা এহাজাৰ কাৰ্টন বিলাতী সুৰালৈ দুখন ট্ৰাক যোৰহাটলৈ বুলি ৰাওনা হয় যদিও ট্ৰাক দুখন যোৰহাট পোৱাৰ পূর্বেই দুষ্ট চক্ৰৰ দ্বাৰা অপহৰণ কৰা হয়।

ঘটনাৰ ভিত্তিত সুৰাৰ গৰাকীজনৰ অভিযোগৰ ভিত্তিত গড়চুক থানাত ১৪৫/১৯ নম্বৰত এটা গোচৰ ৰুজু কৰা হয়। আৰক্ষীৰ অপৰাধ আৰু অনুসন্ধান শাখাই বিষয়টোৰ তদন্ত আৰম্ভ কৰি গোলাঘাট আৰক্ষীৰ সৈতে যোগাযোগ কৰে।

সোমবাৰে গোলাঘাট আৰক্ষীয়ে গোপন সূত্ৰৰ পম খেদি শান্তিপূৰৰ বাসিন্দা আমজাদ খানৰ বাসগৃহত এখন চুৰি ট্ৰাক  থকাৰ কথা জানিব পাৰে আৰু লগে লগে ধৃত আমজাদক সোধপোচ আৰম্ভ কৰে। ব্যক্তিজনৰ স্বীকাৰোক্তিৰ ভিত্তিত সমগ্ৰ চুৰিকাৰ্য আৰু আঁৰৰ ব্যক্তিকেইজনৰ কথা পোহৰলৈ আহে।

জানিব পৰা মতে সমগ্র ঘটনাৰ পৰিকল্পনা কৰিছিল অভিজিত বৰাই । নিজৰ ভাতৃৰ  এখন ট্ৰাকসহ দুইখন গাড়ী অভিজিতে অপহৰণ কৰি আনি আমজাদৰ বাসগৃহত ৰাখে আৰু কিছুদিনৰ পাছত গাড়ী দুখন চুৰি হোৱা বুলি দেৰগাঁও থানাত এটা ভূৱা গোচৰ তোৰে।

আনহাতে, সমগ্ৰ ঘটনা ইমান সংগোপনে সংঘটিত হৈছিল যে কোনোধৰণৰ শ্ৰমিক অবিহনে তেওঁলোক  ছয়জন লোকেই সুৰাখিনি ট্ৰাকৰ পৰা নমোৱা আৰু দুদিনৰ ভিতৰত ৭ খন টাটা মোবাইল গাড়ীৰে  শিলনীজানলৈ লৈ গৈ বিক্ৰী কৰা কাম সমাধান কৰিছিল।

বিশ লাখ টকা মূল্যৰ সুৰাখিনি চুৰি চক্ৰটোৱে ১৪ লাখ টকাত বিক্ৰী কৰে। বৰ্তমান আৰক্ষীয়ে উক্ত টকাখিনিৰ অনুসন্ধান চলাই আছে। আজি উক্ত চোৰৰ দলটোক গড়চুক আৰক্ষী আৰু অপৰাধ অনুসন্ধান শাখাই গুৱাহাটীত হাজিৰ কৰাৰ পাছত কালিলৈ পুনৰ গোলাঘাটলৈ আনিব বুলি জানিব পৰা গৈছে। অতি কৌশলপূৰ্ণভাবে নগৰৰ মাজমজিয়াত সংঘটিত কৌশলপূৰ্ণ চুৰিকাৰ্য আৰু চোৰৰ দলটোৰ তথ্য পোহৰলৈ অহাৰ পিছত আজি সমগ্ৰ জিলাখনতে চাঞ্চল্যৰ সৃষ্টি হৈছে।