দিল্লীৰ নিজামুদ্দিনৰ তবলিগী জামাতলৈ গৈছিল মাৰ্ঘেৰিটাৰ ৬ জন লোক

দিল্লীত মাৰ্কাজৰ ধৰ্মীয় অনুষ্ঠানত অংশ লোৱা ২৪ জন ক’ৰ’নাত আক্ৰান্ত হোৱাৰ লগতে ৪৪১ জন বৰ্তমান জ্বৰ-কাঁহত আক্ৰান্ত হোৱাৰ খবৰে দেশবাসীক উদ্বিগ্ন কৰি তুলিছে।

আটাইতকৈ উদ্বেগজনক কথাটো হ’ল অসমৰ বিভিন্ন প্ৰান্তৰ পৰা প্ৰায় ৪০০ৰো অধিক লোকে অংশ লৈছিল জামাতত। আৰু ইয়াৰে ছগৰাকী ব্যক্তি মাৰ্ঘেৰিটাৰ।

মাৰ্ঘেৰিটাৰ ছগৰাকী ব্যক্তিৰ ভিতৰত এগৰাকী মাৰ্ঘেৰিটা তল বজাৰৰ এখন জনপ্ৰিয় জোতা দোকানৰ স্বত্বাধিকাৰী।

জানিব পৰা মতে ব্যক্তিজন ১৭ মাৰ্চত দিল্লীৰ পৰা উভতি আহি প্ৰশাসনক এই সম্পৰ্কে একো অৱগত কৰা নাছিল। কিন্তু ভয়ংকৰ কথাটো হ’ল উক্ত ব্যক্তিজনে ভাৰতীয় ৰেড ক্ৰছ ছ’চাইটি মাৰ্ঘেৰিটা শাখাৰ সদস্যৰ লগত যোৱা ২৯ মাৰ্চত মাৰ্ঘেৰিটাৰ শতাধিক দুখীয়া লোকৰ ঘৰে ঘৰে গৈ খাদ্য সামগ্ৰী বিতৰণ কৰিছিল।

গুৰুত্বপূৰ্ণ কথাটো হ’ল স্বয়ং মহকুমাধিপতি ৰেড ক্ৰচ চচাইটিৰ সভাপতি।

কিন্তু মঙলবাৰে নিশা এই কথা জানিব পাৰি লগে লগে মাৰ্ঘেৰিটা প্ৰশাসন তথা স্বাস্থ্য বিভাগৰ তৰফৰ পৰা  ব্যক্তিজনক হোম কোৱাৰেণ্টাইনৰ ব্যৱস্থা কৰে।

উল্লেখ্য যে মাৰ্ঘেৰিটাৰ পৰা নিজামুদ্দিনলৈ যোৱা বাকী ৫ জন লোক বৰ্তমান উত্তৰ প্ৰদেশত থকা বুলি জানিব পৰা গৈছে।