বাংগালুৰত শিশু-মহিলাসহ ৬০ গৰাকী বাংলাদেশী নাগৰিকক গ্ৰেপ্তাৰ

শনিবাৰে বাংগালুৰ আৰক্ষীৰ চেণ্ট্ৰেল ক্ৰাইম ব্ৰাঞ্চে মহানগৰখনত অবৈধভাৱে বাস কৰি থকা ৬০ গৰাকী বাংলাদেশী নাগৰিকক গ্ৰেপ্তাৰ কৰে।

গ্ৰেপ্তাৰ কৰা সকলৰ ভিতৰত ২৯ গৰাকী পুৰুষ, ২২ গৰাকী মহিলা আৰু ৯ টি শিশু আছে।

বাংগালুৰৰ মহানগৰ আৰক্ষী আয়ুক্ত ভাষ্কৰ ৰাওয়ে কয়, “গ্ৰপ্তাৰ কৰা লোকসকল বাংগালুৰৰ দাঁতি-কাষৰীয়া অঞ্চলৰ জুপুৰিসমূহত বাস কৰি আহিছিল।“

বিদেশী আইন, ১৯৪৬ৰ অধীনত গ্ৰপ্তাৰ কৰা উক্ত ব্যক্তিসকলৰ লগত ভিচা ইত্যাদি নাছিল বুলি উল্লেখ কৰি তেওঁ লগতে কয়, “তেওঁলোকক সোনকালেই বাংলাদেশলৈ প্ৰত্যৰ্পণ কৰা হ’ব।“

উল্লেখযোগ্য যে কৰ্ণাটকৰ গৃহ মন্ত্ৰী বাসৱৰাজ বোমাইয়ে ৰাজ্যখনত থকা অনুপ্ৰৱেশকাৰী আৰু নিৰ্দিষ্ট সময়সীমাতকৈ অধিক দিন থকা নাগৰিকৰ এখন ডাটাবে’চ তৈয়াৰ কৰা হ’ব বুলি ঘোষণা কৰাৰ এদিন পিছতে বাংলাদেশী লোককেইজনক গ্ৰপ্তাৰ কৰা হয়।